O‘zbekistonliklarni Olimpiadaning navbatdagi yorqin kechasi kutmoqda

Olimpiadaning o‘zbek sportchilariga atalgan kechki dasturidan bir qancha sportchilarimizning chiqishi o‘rin olgan. Ahamiyatlisi, barcha sportchilarimiz medallar uchun kurash olib boradi.

Omadsiz yakunlar

9-avgust kuni Parij Olimpiadasining 14-kun bellashuvlari o‘tkazilmoqda. Kunduzgi dasturdan o‘rin olgan chiqishlarda bir qancha sportchilarimiz kurashga kirishdi. Dastlab, Suvga sakrash sport turidagi vakilimiz Igor Myalin chiqish qilib, ilk raundga ko‘ra 64 ball, ikkinchi raundda esa 25.50 ballni qo‘lga kiritdi. Sportchimiz uchinchi urinishda 70.20 ballni qo‘lga kiritdi. Umumiy hisobda Igor Myalin 357.10 ochko bilan 26 nafar sportchi ichida 21-o‘rinni egalladi. Afsuski, bu yarim finalga chiqish uchun yetarli emas edi. Shuningdek, taekvondochamiz Ozoda Sobirjonova ham serbiyalik raqibasiga mag‘lub bo‘ldi.

Erkin kurash va badiiy gimnastika

Shundan so‘ng birin-ketin erkin kurashchilarimizning chiqishlari bo‘lib o‘tdi. Dastlab, Jasurbek Jaysunov Eron vakiliga imkoniyatni boy berdi. Undan so‘ng Javrail Shapiyev bronza uchun o‘tish bahsida kanadalik raqibga qarshi kechgan bahsda g‘alaba qozondi. Bundan tashqari yana bir kurashchimiz Razambek Jamalov chorak final bosqichida albaniyalik raqibini taslim qilib, yarim final bosqichiga yo‘l oldi. Bu orada badiiy gimnastikachilarimiz jamoaviy chiqishning saralashida 64.000 ball jamg‘arib, 7-o‘rinni egallagan holda final bosqichiga chiqishdi. Final ertaga, 10-avgust kuni soat 17:00 da boshlanadi. 

Medalli oqshom

Yuqorida ta’kidlaganimizdek, Olimpiadaning kechki dasturidan bir qancha sportchilarimizning chiqishi o‘rin olgan. Ahamiyatlisi, barcha sportchilarimiz medallar uchun kurash olib boradi. Jadval quyidagicha:

21:20 dan so‘ng. Erkin kurash. Razambek Jamalov - Viktor Rassadin (Tojikiston), (74 kg, yarim final)

22:10 dan so‘ng. Erkin kurash. G‘ulomjon Abdullayev - Bekzat Almaz Uluu (Qirg‘iziston) (57 kg, bronza medali uchun)

22:25 dan so‘ng. Erkin kurash. Javrail Shapiyev - Aaron Bruks (AQSH), (86 kg, bronza medali uchun)

00:30. Boks. Asadxo‘ja Mo‘ydinxo‘jayev - Marko Alonso Verde (Meksika) (71 kg, final)

01:34. Boks. Lazizbek Mullojonov - Alfonso Dominges (Ozarbayjon) (92 kg, final)

Musobaqaning umumiy reytingi

Umumiy reytingda o‘n uch kunlik bahslardan keyin 30 ta oltin medal qo‘lga kiritgan AQSH terma jamoasi peshqadam bo‘lib turibdi. O‘zbekiston esa uchta oltin va ikkita bronza medali bilan 18-o‘rinni band etgan.