O‘zbekistonda to‘ylar kamaymoqda
O‘zbekistonda nikohlar soni ketma-ket to‘rt yildan beri kamaymoqda. 2021-yilda 305 mingdan ortiq juftlik oila qurgan bo‘lsa, 2025-yilga kelib bu raqam 267 mingga tushgan.
2 daqiqa o‘qiladi
Tug‘ilishlar sonida ham pasayish kuzatilmoqda.
Nikohlar soni qanchaga qisqardi?
Statistika agentligi ma’lumotlariga ko‘ra, 2026-yilning dastlabki olti oyida O‘zbekistonda 92,3 mingta nikoh qayd etilgan.
Mamlakatda 2021-yilda 305,2 mingta nikoh rasmiylashtirilgan. Keyingi yillarda esa bu ko‘rsatkich muntazam kamaygan: 2022-yilda 296,7 mingta, 2023-yilda 283,8 mingta, 2024-yilda 271,8 mingta va 2025-yilda 267,1 mingta nikoh qayd etilgan.
Mustaqillik davridagi eng yuqori ko‘rsatkich 2018-yilga to‘g‘ri keladi. O‘sha yili 311,4 mingta nikoh tuzilgan. Eng past ko‘rsatkichlar esa 1995–2000-yillarda kuzatilgan — yiliga 168–171 ming atrofida.
Taqqoslash uchun, 1991-yilda 270,3 mingta, 2005-yilda 184 mingta, 2010-yilda 292,3 mingta, 2015-yilda 287,6 mingta, 2020-yilda esa 296,8 mingta nikoh rasmiylashtirilgan.
Tug‘ilishlar soni ham kamaymoqda
O‘zbekistonda nafaqat nikohlar, balki tug‘ilishlar soni ham qisqarmoqda.
2025-yilda mamlakatda 879,6 ming nafar chaqaloq tug‘ilgan. Bu 2024-yilga qaraganda 46,8 ming nafarga yoki 5 foizga kam.
2026-yilning yanvar–mart oylarida esa 191,1 mingta tug‘ilish qayd etilgan. Bu so‘nggi besh yilning birinchi choraklari orasidagi eng past natija.
Taqqoslash uchun, 2024-yilning dastlabki uch oyida 205,7 ming, 2025-yilning shu davrida esa 198,1 ming nafar chaqaloq dunyoga kelgan.
Shunday qilib, so‘nggi yillarda O‘zbekistonda ham oila qurish, ham farzandli bo‘lish ko‘rsatkichlari pasaymoqda. Biroq statistikaning o‘zi bu o‘zgarishlarga aynan nima sabab bo‘layotganini ko‘rsatmaydi.
Fotogalereya 1 ta surat
