“Qora dayjest”: 2025-yil 24-yanvar voqealari

Toshkentda 5 ta avtomobil ishtirokida YTH sodir bo‘ldi

Toshkentning Yunusobod tumanida 5 ta avtomobil ishtirokida yo‘l-transport hodisasi sodir bo‘ldi. Bu haqda YHXB axborot xizmati xabar berdi.

Ma’lum qilinishicha, hodisa 23-yanvar kuni soat 15:20 da Kichik halqa avtomobil yo‘li ko‘chasida sodir bo‘lgan. Nexia-2, Nexia-3, Spark va 2 ta Lacetti o‘zaro to‘qnashgan.

Yo‘l harakati xavfsizligi boshqarmasi xabariga ko‘ra, transport hodisasi oqibatida tan jarohati olganlar haqida hech qanday xabar kelib tushmagan.

Holat yuzasidan Toshkent shahar IIBB YHXB mas’ul xodimlari tomonidan surishtiruv ishlari olib borilmoqda, deyiladi boshqarma axborotida.

“Tashkent City”da yangi qurilgan binolardan birida yong‘in chiqdi

“Tashkent City”da yangi qurilgan binolardan biridan yong‘in sodir bo‘ldi. Poytaxt Favqulodda vaziyatlar boshqarmasi voqea yuzasidan izoh berdi.

Uning xabar berishicha, yong‘in haqida ma’lumot soat 19:49 da kelib tushgan. To‘qqiz qavatli uyning tomi yongan.

Ma’lumotlarga ko‘ra, qurbonlar va jabrlanganlar yo‘q. Hozir mutaxassislar yong‘in sabablarini aniqlash va moddiy zararni baholash bilan shug‘ullanmoqda.

Buxoroda 132 million qalbaki pulni 3 ming dollarga sotmoqchi bo‘lgan shaxs qo‘lga olindi

Buxoro viloyati G‘ijduvon tumani IIB xodimlari tomonidan qalbaki pul ishlab chiqarish va sotishga chek qo‘yildi. Tezkor tadbir davomida nominal qiymati 20 ming so‘m (umumiy qiymati – 132,88 million so‘m) bo‘lgan 6 644 dona qalbaki banknotlarni 3 ming dollarga sotishga uringan 26 yoshli Chirchiq shahrida yashovchi ushlandi.

Huquq-tartibot idoralari xodimlari uning Toshkent viloyati Ohangaron tumanida yashovchi fuqarolardan qalbaki pul sotib olganini aniqladi. Ijaraga olingan xonadonda 28 va 32 yoshli ikki nafar erkak rangli printerda nominal qiymati 100 ming so‘m bo‘lgan qalbaki banknotlarni ishlab chiqargan.

Ulardan quyidagilar musodara qilindi:

28,3 million so‘mlik qalbaki pullar,

qog’oz hisoblarini kesish uchun qurilma,

o’rash qog’ozi,

plastik qoplar.

Buxoroda 32 yoshli ayol tug‘ruqxonada vafot etdi

Buxoro viloyati Sog‘liqni saqlash boshqarmasi holat yuzasidan rasmiy munosabat bildirdi.

Ma’lum qilinishicha, marhuma Respublika ixtisoslashtirilgan akusherlik va ginekologiya ilmiy-amaliy tibbiyot markazining Buxoro filiali (Perinatal markaz)ga qabul qilinganida, unda kuchli shamollash alomatlari kuzatilgan. Ayolda yo‘tal, tana haroratining 38 darajaga ko‘tarilishi, homila suvining ketishi va umumiy holsizlik belgilari bo‘lgan.

Tug‘ruq jarayonidan so‘ng bemorning ahvoli birdan yomonlashib, nafas yetishmovchiligi belgilari paydo bo‘lgan. Teri qoplamlari rangpar tusga kirib, sianoz (ko‘karish) kuzatilgan.

Bemor sun’iy nafas olish apparatiga ulanib, intensiv reanimatsion choralar qo‘llanilgan. Bemorda kardiomonitor orqali yurak fibrillyatsiyasi aniqlangan. Yurak faoliyatini tiklash va fibrillyatsiyani oldini olish maqsadida Adrenalin, Atropin, Solumedrol, Norepinefrin, Dofamin kabi dori vositalari qo‘llangan.

Biroq barcha zarur choralar amalga oshirilganiga qaramay, yurak faoliyatini tiklash imkoni bo‘lmagan.