MTRKga qarashli telekanallarning rahbarlar tarkibi o‘zgardi

Shavkat Mirziyoyevning tegishli farmoniga ko‘ra, O‘zbekiston milliy teleradiokompaniyasi tizimidagi tashkilotlarni qayta tuzish dasturi bo‘yicha telekanallar bir qator birlashmalar tarkibiga qo‘shilgan. 

Ijodiy birlashmalarning yangilangan tarkibi

“Daryo” nashri o‘zining MTRKdagi manbasiga tayanib xabar berishicha, bugun O‘zbekiston milliy teleradiokompaniyasiga qarashli bir qator telekanallar tuzilmasi va ulardagi rahbarlar tarkibi o‘zgargan. Kanallar tarkibidagi o‘zgarishlar quyidagicha bo‘lgan:

"O‘zbekiston 24" ijodiy birlashmasi tarkibiga "O‘zbekiston 24", "O‘zbekiston", "Dunyo bo‘ylab" telekanallari va "O‘zbekiston 24" radiokanali;

"Ma’rifat" ijodiy birlashmasi tarkibiga "Madaniyat va ma’rifat", "O‘zbekiston tarixi", "Bolajon" va "Kinoteatr" telekanallari;

"Yoshlar" ijodiy birlashmasiga "Yoshlar", "Navo" telekanallari va "Yoshlar" radiokanali;

"Sport" ijodiy birlashmasi tarkibiga "Sport" va "Futbol TV" telekanallari o‘tkazildi.

Rahbarlar tarkibi

Ma’lumotda qayd etilishicha, "O‘zbekiston24" ijodiy birlashmasiga Haydar Hasanov, "Ma’rifat" ijodiy birlashmasiga Vohid Luqmonov, "Yoshlar" ijodiy birlashmasiga Husniddin Ergashev, "Sport" ijodiy birlashmasiga esa Zohid Karimov 3 oylik sinov muddati bilan vaqtincha direktor vazifasini bajaruvchi bo‘lgan. Shuningdek, ijodiy birlashmalar tarkibidagi telekanallarga 3 oylik sinov muddati bilan o‘rinbosar vazifasini vaqtincha bajaruvchilar ham tayinlandi. "O‘zbekiston 24" telekanaliga Shunqor Choriyev, "Madaniyat va ma’rifat" telekanaliga Orif Ahmedov, "O‘zbekiston" telekanaliga Dilshod Fayz, "Navo" telekanaliga Nasriddin Asriddinov, "O‘zbekiston tarixi" telekanaliga Alisher Shoimov, "Futbol TV" telekanaliga Darmon Ibrohimov direktor o‘rinbosari bo‘ladi.