Chili va Turkiya tajribasi Buxoro bog‘lariga kirib kelmoqda

Romitan tumanida qariyb 200 nafar bog‘bon va fermer uchun sanoat usulidagi intensiv bog‘dorchilik bo‘yicha amaliy seminar o‘tkazildi. Chili va Turkiyadan kelgan mutaxassislar mahalliy fermerlarga ko‘chat tanlashdan tortib, zamonaviy agrotexnologiyalar yordamida hosildorlikni oshirishgacha bo‘lgan yo‘nalishlarda o‘z tajribasini ulashdi.

Buxoro viloyatida sanoat usulidagi intensiv mevali bog‘larni rivojlantirish bo‘yicha amaliy ishlar davom ettirilmoqda. Shu maqsadda Romitan tumanining Bog‘iturkon mahallasida bog‘bon va fermerlar uchun maxsus seminar tashkil etildi.

MKBANK tomonidan Prezidentning 2026-yil 9-iyundagi PF-108-son Farmoni ijrosi doirasida tashkil etilgan tadbirda qariyb 200 nafar bog‘bon va fermer qatnashdi.

Seminarga xorijiy va mahalliy mutaxassislar ham jalb qilindi. Xususan, Chilidan Kristian Rodriges, Turkiyadan Muhammad Yaner, shuningdek, xalqaro agronomlar Shuhrat Abrorov va Ne’matjon Abdullayev fermerlar bilan o‘z tajribalarini bo‘lishdi.

Ko‘chatdan hosilgacha

Seminarning asosiy mavzusi intensiv bog‘larni to‘g‘ri tashkil etish va ularning samaradorligini oshirish bo‘ldi.

Mutaxassislar ko‘chatlarni hudud sharoitiga mos tanlash, bog‘ni tashkil etish, daraxtlarni parvarishlash hamda zamonaviy agrotexnologiyalardan foydalanish bo‘yicha amaliy tavsiyalar berdi.

Bunday yondashuvda maqsad shunchaki yangi bog‘ barpo etish emas. Bog‘ning har bir gektaridan olinadigan hosilni ko‘paytirish, mahsulot sifatini yaxshilash va natijada fermerning daromadini oshirish ko‘zda tutiladi.

Ayniqsa, intensiv bog‘dorchilikda ko‘chat tanlash va dastlabki agrotexnik tadbirlar keyingi hosildorlikka bevosita ta’sir qilishi sababli, seminarda ushbu bosqichlarga alohida e’tibor qaratildi.

Xorij tajribasi mahalliy sharoitga moslashtiriladi

Chili va Turkiya vakillarining seminarga jalb qilinishi fermerlarga boshqa mamlakatlarda qo‘llanayotgan bog‘dorchilik tajribasi bilan bevosita tanishish imkonini berdi.

Mutaxassislar yuqori hosildor bog‘larni yaratish, ularni parvarishlash va zamonaviy texnologiyalardan foydalanish bo‘yicha tajribalarini mahalliy fermerlar bilan muhokama qildi.

Seminardan ko‘zlangan asosiy maqsad xorij tajribasini shunchaki takrorlash emas, balki samarali usullarni Buxoro sharoitiga moslashtirib, sanoatlashgan bog‘dorchilikni kengaytirishdan iborat.

MKBANK ma’lumotiga ko‘ra, tadbir Buxoro viloyatida zamonaviy va yuqori samarali bog‘lar sonini ko‘paytirish, hosildorlikni oshirish hamda bog‘bon va fermerlarning daromadini ko‘paytirishga qaratilgan.

Reklama huquqlari asosida