Savdo, transport va madaniyat: O‘zbekiston va Pokiston hamkorlikni rivojlantiradi

O‘zbekiston va Pokiston o‘rtasidagi strategik hamkorlik keyingi yillarda yangi bosqichga ko‘tarilib, savdo, transport va madaniy aloqalarni yanada kengaytirish rejalashtirilmoqda. Prezident Shavkat Mirziyoyev va Pokiston Bosh vaziri Shahboz Sharif o‘tkazgan muzokaralar chog‘ida ushbu yo‘nalishlar bo‘yicha muhim kelishuvlarga erishildi, deb xabar bermoqda Prezident matbuot xizmati.

Savdo aloqalarini kengaytirish

So‘nggi yillarda ikki davlat o‘rtasidagi savdo hajmi sezilarli darajada oshib, 2024-yilda 400 million dollardan oshdi. Muloqot chog‘ida bu raqamni 2 milliard dollarga yetkazish bo‘yicha aniq chora-tadbirlar ishlab chiqildi. Kelgusida savdo cheklovlarini kamaytirish, imtiyozli shartlarni kengaytirish hamda fitosanitariya va bojxona tartib-taomillarini soddalashtirish bo‘yicha hamkorlik yo‘lga qo‘yiladi. Shuningdek, elektron savdo platformalarini birlashtirish va bank tizimlari o‘rtasida tezkor hisob-kitob mexanizmini yo‘lga qo‘yish rejalashtirilgan. O‘zbekiston va Pokiston o‘rtasidagi iqtisodiy hamkorlikning muhim jihatlaridan biri qo‘shma sanoat va investitsiya loyihalarini amalga oshirish bo‘lib, tomonlar farmatsevtika, elektr texnika, qishloq xo‘jaligi mashinasozligi, geologiya va tekstil sanoati kabi yo‘nalishlarda qo‘shma ishlab chiqarish imkoniyatlarini ko‘rib chiqmoqda.

Transport va tranzit aloqalarining rivoji

Prezident Mirziyoyev va Bosh vazir Sharif transport sohasidagi hamkorlikka alohida urg‘u berdi. “O‘zbekiston – Afg‘oniston – Pokiston” multimodal transport yo‘lagi orqali yuk tashish hajmi keyingi yillarda 5 barobar oshgani ta’kidlandi. Bu yo‘nalishni yanada rivojlantirish uchun qo‘shma transport-logistika kompaniyasi tashkil etish bo‘yicha kelishuvga erishildi. Shuningdek, Transafg‘on temir yo‘li loyihasini tezlashtirish va yuk tashish imkoniyatlarini kengaytirish borasida hamkorlik kuchaytiriladi. Toshkent va Laho‘r o‘rtasida to‘g‘ridan-to‘g‘ri aviaqatnovlar tiklangani va savdo uylarining ochilgani ham muloqot davomida muhim natijalar sifatida qayd etildi.

Mintaqaviy madaniy aloqalar

O‘zbekiston va Pokiston o‘rtasidagi madaniy-gumanitar hamkorlik ham jadallashmoqda. Tomonlar madaniyat haftaliklari, turizm dasturlari va qo‘shma tadbirlarni o‘tkazish bo‘yicha kelishib oldi. O‘zbekistonda ikki davlat hududlari o‘rtasida maxsus forum tashkil etish rejalashtirilmoqda. Bu tadbir tadbirkorlar va ijodkorlar o‘rtasidagi aloqalarni yanada mustahkamlashga xizmat qiladi. Turizm sohasida ham aloqalarni kengaytirish ko‘zda tutilgan. Tarixan bog‘langan ikki davlatning madaniy merosini targ‘ib qilish va ziyorat turizmini rivojlantirish bo‘yicha maxsus dasturlar ishlab chiqiladi.

Xalqaro maydondagi hamkorlik

Muzokaralar davomida O‘zbekiston va Pokiston xalqaro tashkilotlar, jumladan, BMT, SHHT, Islom hamkorlik tashkiloti va Qo‘shilmaslik harakati doirasidagi o‘zaro qo‘llab-quvvatlashni davom ettirishga kelishib oldilar. Shuningdek, tomonlar terrorizm, radikallik va islomofobiyaga qarshi kurashda birgalikda harakat qilish zarurligini ta’kidladilar.

Kelajak rejalar

Oliy darajadagi uchrashuv yakunida tomonlar Strategik sheriklik kengashini tashkil etish va uning ilk yig‘ilishini 2026-yilda o‘tkazish bo‘yicha qaror qabul qildilar. Shuningdek, erishilgan kelishuvlarni amalga oshirish uchun qo‘shma “yo‘l xaritasi” ishlab chiqilishi ham tasdiqlandi.