Ilmiy darajaga ega o‘qituvchilarga ipoteka beriladi

O‘zbekistonda uy-joy sotib olishda qo‘llab-quvvatlashning yangi mexanizmlari joriy etilmoqda. Endilikda yetakchi xorijiy oliy ta’lim muassasalarida ilmiy daraja olgan yosh mutaxassislar imtiyozli shartlarda ipoteka rasmiylashtirishi mumkin. Shu bilan birga, davlat pedagoglarni ham qo‘llab-quvvatlashni kuchaytirmoqda — ular uchun uy-joy xaridida alohida yordam choralarini nazarda tutgan.

Top xorijiy OTM bitiruvchilari uchun ipoteka

2026-yil 9-apreldagi 159-sonli hukumat qaroriga muvofiq, nufuzli xorijiy universitetlarda ilmiy daraja olgan yosh mutaxassislarga ipoteka kreditlari berishning yangi tartibi tasdiqlandi.

Gap xalqaro reytinglarda TOP-100 talikka kiruvchi oliy ta’lim muassasalari haqida bormoqda. Yangi chora malakali kadrlarni qo‘llab-quvvatlash hamda ularning mamlakatga qaytib, ishlashini rag‘batlantirishga qaratilgan.

Dastur shartlari:

• maksimal kredit miqdori — 2150 bazaviy hisoblash miqdorigacha (BHM);

• muddati — 10 yilgacha;

• foiz stavkasi — yillik 14%;

• uy-joy faqat birlamchi bozordan xarid qilinadi;

• kredit miqdori uy-joy qiymatining 80 foizidan oshmasligi kerak.

Ariza Yagona interaktiv davlat xizmatlari portali (my.gov.uz) orqali elektron shaklda topshiriladi.

Kimlar murojaat qilishi mumkin

Ipoteka olish uchun quyidagi talablarga javob berish zarur:

• O‘zbekiston fuqarosi bo‘lish;

• ariza topshirish vaqtida 35 yoshdan oshmagan bo‘lish;

• TOP-100 talikka kiruvchi xorijiy OTMda olingan ilmiy darajaga ega bo‘lish;

• diplomni tan olish (nostrifikatsiya) jarayonidan o‘tgan bo‘lish.

Arizaga sotib olinadigan uy-joy bo‘yicha quruvchi bilan tuzilgan shartnoma ilova qilinadi.

Hujjatlar topshirilgach, tijorat banki uch ish kuni ichida arizachining to‘lov qobiliyatini baholaydi va xulosani Oliy ta’lim, fan va innovatsiyalar vazirligiga yuboradi.

Tajribali pedagoglarga qo‘llab-quvvatlash

Yuqori malakaga ega o‘qituvchilar uchun ham alohida choralar ko‘zda tutilgan.

Oliy malaka toifasiga ega va kamida 15 yil ish stajiga ega pedagoglar ipoteka rasmiylashtirishda davlat ko‘magiga ega bo‘lishlari mumkin.

Ariza davlat xizmatlari markazlari yoki my.gov.uz portali orqali topshiriladi. Ko‘rib chiqish jarayoni avtomatlashtirilgan bo‘lib, idoralararo axborot tizimlari orqali fuqaroning fuqaroligi, ish staji, malaka darajasi, daromadlari va kredit tarixi tekshiriladi.

Tasdiqlangandan so‘ng pedagog tijorat bankini tanlaydi va birlamchi bozordan uy-joy sotib olish uchun ipoteka kreditini rasmiylashtiradi.

Moliyalashtirish va cheklovlar

Davlat yordami har bir oila uchun faqat bir marta va turmush o‘rtoqlardan biriga beriladi hamda faqat birlamchi bozordagi uy-joylarga tatbiq etiladi.

2026-yilda ushbu maqsadlar uchun davlat budjetidan 200 mlrd so‘mgacha mablag‘ ajratilishi rejalashtirilgan. Mablag‘larni taqsimlash jarayoni to‘liq raqamlashtirilgan bo‘lib, shaffoflikni ta’minlash va inson omilini minimallashtirishga qaratilgan.