Instagram so‘nggi yillardagi eng katta tozalashni boshladi

Instagram botlar, feyk va faol bo‘lmagan akkauntlarni ommaviy o‘chirishni boshladi. 6-maydan boshlab dunyo bo‘ylab foydalanuvchilar obunachilar soni keskin kamayganini payqadi — bu holat oddiy blogerlar bilan bir qatorda jahon mashhurlariga ham ta’sir qildi.

Ijtimoiy tarmoqlarda bu jarayon allaqachon “2026 yilning Buyuk tozalashi” deb atala boshladi. Foydalanuvchilarning aytishicha, platforma bir necha soat ichida millionlab “o‘lik jonlar”ni o‘chirib tashlagan va bu ko‘plab akkauntlar auditoriyasining keskin qisqarishiga olib kelgan.

Mashhurlar millionlab obunachilarini yo‘qotdi

Eng katta yo‘qotishlar Kayli Jenner akkauntida kuzatildi — u taxminan 14–15 million obunachisini yo‘qotgan.

Cristiano Ronaldo esa turli hisob-kitoblarga ko‘ra 8 milliondan 18 milliongacha obunachidan ayrilgan. Shunga qaramay, u hali ham Instagram’dagi eng mashhur inson bo‘lib qolmoqda — uning auditoriyasi taxminan 666 million nafarni tashkil qiladi.

Selena Gomez, Ariana Grande, Naylor Swift va Lionel Messi akkauntlarida ham sezilarli pasayish qayd etildi.

Foydalanuvchilar ayniqsa BLACKPINK atrofidagi vaziyatni faol muhokama qilmoqda — guruh, ijtimoiy tarmoqlardagi ma’lumotlarga ko‘ra, taxminan 10 million obunachisini yo‘qotgan. Shuningdek, BTS auditoriyasi kamaygani ham payqalgan.

Instagram’da nima bo‘lmoqda?

Xorijiy OAV ma’lumotlariga ko‘ra, platforma botlar, sun’iy nakrutka va avtomatlashtirilgan faollikka qarshi kurashni kuchaytirgan. Taxminlarga ko‘ra, sun’iy intellekt asosidagi yangi algoritmlar shubhali akkauntlarni avtomatik tarzda aniqlab, ularni o‘chirmoqda.

Tozalash faqat mashhurlarga emas, oddiy foydalanuvchilarga ham ta’sir qildi. Ko‘plab kichik blogerlar bir necha yuzdan o‘n minglab obunachilarini yo‘qotganini ma’lum qildi. O‘rtacha hisobda sahifalar auditoriyasining 2–5 foizini yo‘qotgan, ammo nakrutkadan foydalangan akkauntlarda bu ko‘rsatkich ancha yuqori bo‘lgan.

Bundan tashqari, Instagram yaqinda kontentni targ‘ib qilish qoidalarini ham o‘zgartirdi. Endi ijtimoiy tarmoq original kontentga ko‘proq e’tibor qaratmoqda va avtomatlashtirilgan SI-vositalaridan ommaviy foydalanadigan yoki boshqalar kontentini ko‘p joylashtiradigan sahifalar qamrovini cheklashi mumkin.

Tozalash hali ham davom etmoqda

Hozircha Instagram yoki Meta tomonidan jarayon miqyosi bo‘yicha rasmiy izoh berilmagan. Ammo foydalanuvchilar akkauntlar o‘chirilishi hali ham davom etayotganini va ko‘plab sahifalarda obunachilar soni deyarli har soat o‘zgarayotganini aytmoqda.