O‘zbekistonliklar inflyatsiya kuchayishidan xavotirlanmoqda

Markaziy bank inflyatsion kutilmalarni e’lon qildi.

So‘rovnoma natijalari

Markaziy bank hisobotiga ko‘ra, tadbirkorlar va aholining kommunal xizmatlar qimmatlashuvidan xavotir darajasi ortgan. O‘tgan oyda jami 1971 ta respondent o‘rtasida o‘tkazilgan so‘rovnoma natijalariga ko‘ra, aholining inflyatsiya bo‘yicha yillik kutilmalari 1,2 (foiz) bandga ko‘tarilib, 14 foizni tashkil etgan.

Kelajakda kutilmalari

Respondentlar kelajakda narxlar ko‘tarilishiga avvalo kommunal xizmat narxlarining ortishi (55 foiz), valyuta kursining o‘zgarishi (55 foiz), monopoliya va narxlarning sun’iy oshirilishi (29 foiz), transport xarajatlarining oshishi (28 foiz) kabi omillar ta’sir qiladi, degan fikr bildirgan.

O‘zgarishlar hududlar kesimida

Aholi inflyatsion kutilmalarining eng yuqori ko‘rsatkichi Toshkent shahrida kuzatilgan bo‘lsa, eng past inflyatsion kutilmalar Qoraqalpog‘iston Respublikasida istiqomat qiladigan aholi tomonidan qayd etilgan. Tadbirkorlik subyektlarining eng yuqori inflyatsion kutilmalari Toshkent shahrida kuzatilgan bo‘lsa, eng past kutilmalar Surxondaryo viloyatida faoliyat olib boradigan tadbirkorlar tomonidan qayd etilgan.