Gemini sun’iy intellektida “ma’lumotlar migratsiyasi” paydo bo‘ldi

Google korporatsiyasi o‘zining sun’iy intellekt loyihasi — Gemini imkoniyatlarini kengaytirishda navbatdagi strategik qadamni tashladi. Endilikda platforma nafaqat aqlli muloqotdoshi, balki foydalanuvchining shaxsiy raqamli xotirasiga va boshqa servislar bilan uzviy bog‘langan ekotizimga aylanmoqda. Bu o‘zgarishlar sohada raqobat muhitini butunlay o‘zgartirib yuborishi kutilmoqda.

Yangi “Xotira”

Platformadagi eng ko‘zga ko‘ringan o‘zgarishlardan biri bu “O‘tgan chatlar” bo‘limining “Xotira” (Memory) deb qayta nomlanishidir. Bu transformatsiya Gemini-ning ish prinsiplari tubdan yangilanganidan dalolat beradi. Endi tizim foydalanuvchining individual afzalliklarini, muloqot uslubini va muhokama qilingan mavzular kontekstini ancha chuqur o‘zlashtiradi hamda kelgusidagi javoblarda ushbu ma’lumotlarga tayanadi.

Ma’lumotlar migratsiyasi

Google foydalanuvchilar uchun boshqa chatbotlardan Gemini-ga o‘tishni mislsiz darajada osonlashtirdi. Eng shov-shuvli yangilik — bu chatlar tarixini import qilish funksiyasidir. Foydalanuvchilar o‘zlarining boshqa sun’iy intellekt servislaridagi arxivlarini (5 GB gacha bo‘lgan .zip formatida) tizimga yuklashlari mumkin. Bu esa yillar davomida to‘plangan bilimlar va ishlanmalar zoe ketmasligini hamda muloqotni aynan to‘xtagan nuqtadan davom ettirish imkonini beradi.

Shuningdek, “Xotirani import qilish” funksiyasi ham ishga tushirildi. Bu mexanizm orqali muayyan promptlar (so‘rovlar) yordamida Gemini-ni o‘z didingiz va ehtiyojlaringizga moslab "o‘qitish", boshqa platformadagi ma’lumotlar bilan boyitish mumkin.

Foydalanish doirasi

Hozirda mazkur yangilanishlardan Gemini-ning desktop (kompyuter) versiyasidan foydalanuvchi ham bepul, ham pullik tarif egalari foydalanishlari mumkin. Biroq, hozircha ushbu imkoniyatlar biznes-akkauntlar hamda 18 yoshga to‘lmagan foydalanuvchilar uchun cheklangan.

Xavfsizlik masalasiga to‘xtaladigan bo‘lsak, Google shaffoflik tamoyiliga sodiq qolgan. Foydalanuvchi o‘zi yuklagan arxivlarni yoki alohida suhbatlarni istalgan vaqtda sozlamalar orqali butunlay o‘chirib tashlash huquqiga ega.

Strategik maqsad

Ekspertlarning fikricha, Google-ning bu qadami Claude (Anthropic) va boshqa yirik raqobatchilar bilan kurashda muhim ustunlik beradi. Ma’lumotlarni bir platformadan ikkinchisiga oson ko‘chirish imkoniyati foydalanuvchilarning Gemini-ni asosiy ish quroli sifatida tanlashiga xizmat qiladi. Google shunchaki texnologiyani takomillashtirmayapti, balki foydalanuvchining raqamli hayotini yagona nuqtaga birlashtirishga intilmoqda.