"Haj" ziyoratiga "qurbi yetgan" turizm agentliklari aniqlandi

Ma'lumki, 23-maydan "Haj" mavsumi boshlandi. Ushbu mavsumdan "soqqa" qilaman degan ayrim shaxslar tomonidan fuqarolarimizni "Haj" ziyoratiga yuborishni va’da qilib, ularning pul mablag‘larini o‘zlashtirish holatlari kuzatilmoqda. DXX Bosh prokuratura huzuridagi Departament va ichki ishlar organlari bilan hamkorlikda ushbu "faoliyat" turi bilan shug'illanganlar ustida reyd o'tkazdi.

"Haj" uchun 18 ming dollar

Jumladan, Toshkent shahrining Yakkasaroy tumanida joylashgan sayyohlik firmasining 2 nafar xodimi mahalliy fuqaroning ishonchiga kirib, uning ota-onasini Saudiya Arabistoniga «Haj» safariga borishlari uchun talab etiladigan viza hujjatlarini tayyorlab berish va ularni ziyoratga yuborish evaziga 18 ming AQSh dollari talab qilishib, 4500 AQSh dollari olgan vaqtlarida ushlandi.

Boshlang'ich 5 700 dollar

Toshkent shahrining Yunusobod tumanidagi sayyohlik firmasi rahbari Yashnobod tumanida yashovchi fuqaroni "Haj 2024" mavsumida Saudiya podshohligiga muborak safarga yuborish evaziga 9500 AQSh dollari talab qilib, 5700 AQSh dollari olgan vaqtida qo'lga olindi.

Muqaddam sudlangan "biznesmen"

Toshkent shahrining Shayxontohur tumanida yashovchi, muqaddam sudlangan shaxs ham Surxondaryo viloyatining Sherobod tumanida istiqomat qiluvchi 2 nafar fuqaroni sayyohlik firmasi orqali "Haj" ziyoratiga yuborish evaziga 20 ming AQSh dollari talab qilib, 10 ming AQSh dollari olgan vaqtida ushlandi.

Farg'onadagi sayyohlik firmalari

Farg‘ona shahridagi sayyohlik firmasi ish yurituvchisi esa Toshloq tumanida yashovchi fuqaroni va uning 2 nafar voyaga yetmagan farzandini 30 ming AQSh dollari evaziga "Haj" ziyoratiga yuborishni va’da qilib, 15 ming AQSh dollari olgan vaqtida ushlandi.

Farg‘ona viloyatining Yozyovon tumanida yashovchi shaxs ham Quva tumanida istiqomat qiluvchi fuqaroni va uning ota-onasini "Haj" amallarini bajarishlari uchun sayyohlik firmasi orqali Saudiya Arabistoniga yuborish evaziga 16 ming AQSh dollari olgan vaqtida ushlandi.

Hozirda mazkur shaxslarga nisbatan jinoyat ishlari qo‘zg‘atilib, tergov harakatlari olib borilmoqda.

O'zbekistondan "Haj"ga borish tartibi

Mamlakatimiz fuqarolari uchun "Haj" tadbiri O‘zbekiston Respublikasining Din ishlari bo‘yicha qo‘mitasi va Saudiya Arabistoni Podshohligining Haj va umra vazirligi o‘rtasida har yili imzolanadigan shartnoma asosida O‘zbekiston musulmonlari idorasi tomonidan amalga oshiriladi hamda bunday faoliyat bilan boshqa tashkilotlarning shug‘ullanishiga yo‘l qo‘yilmaydi.

Saudiya Arabistoni talabi

Shuningdek, Saudiya Arabistoni tomonidan belgilangan tartibga muvofiq, chet el fuqarolari uchun "Haj" ziyoratini ado etishning asosiy sharti – "haj" vizasiga ega bo‘lish hisoblanadi. Qolgan barcha turdagi vizalar – "umra", "turizm", "biznes" va boshqalar bilan "Haj" ziyoratiga borish taqiqlanadi.

10 yillik deport

Tartibni buzgan xorijlik Saudiya Arabistonidan deport qilinib, ushbu mamlakatga 10 yil muddatga kirishi taqiqlanadi hamda 50 ming saudiya riyoli miqdorida jarimaga tortiladi.