Қайта тикланувчи энергия манбалари бож тўловини кечиктириб тўлаши мумкин

Эндиликда техник ҳужжатларида ёки маркировкасида сифат кўрсаткичи белгиланмаган товарларнинг импорти тақиқланади. Бу ҳақда ҳукумат қарорида келтириб ўтилган.

Кечиктирилганига фоиз ундирилмайди

Ҳукумат қарорига кўра, жорий йилдан қайта тикланувчи энергия манбалари ва уларнинг асбоб-ускуналари, хомашё, бутловчи ва эҳтиёт қисмларини импорт қилаётганда божхона томонидан қўйиладиган божхона тўловларини 120 кун муддатда тўлаш мумкин. Қулай томони, кечиктирилган тўлов учун фоизлар ундирилмайди.

Шунингдек, мазкур импорт қилиш фаолияти билан 3 йилдан ортиқ давр мобайнида шуғулланаётган, божхона тўловлари бўйича мажбуриятларини ўз вақтида бажариб келган тадбиркорларга 6 ой муддатга божхона тўловларини таъминлаш қўлланилмаган ҳолда, божхона тўловларини бўлиб тўлашга рухсат берилди. 

Бунинг учун тадбиркорлар томонидан охирги 3 йил давомида тўланган божхона тўловларининг миқдори тўлов муддати узайтириладиган сумманинг 50 фоизидан ошмайдиган миқдорини ташкил этиши лозим.

Сифат кўрсаткичи белгиланмаган товарларнинг импорти тақиқланди

Бундан ташқари, техник ҳужжатларида ёки маркировкасида қуёш элементларининг сифат кўрсаткичларини ифодаловчи “А”, “В”, “С” ва “Д” тегишли синфи тўғрисидаги ахборотлар мавжуд бўлмаган қуёш панелларини четдан олиб киришга тақиқ қўйилди. Мазкур чеклов жорий йилнинг 1 мартидан амал қилади. Бунга сабаб эса қуёш панеллари техник жиҳатдан тартибга солиш соҳасидаги норматив ҳужжатлар талабларига мувофиқлиги тасдиқланиши мажбурий бўлган маҳсулотлар рўйхатига киритилгани бўлди. Бундан мақсад эса қайта тикланувчи энергия манбалари асосида энергия таъминотини ривожлантиришдир. 

Бошқа турдаги импортлар устунлигича қолмоқда

Яқинда божхона қўмитаси айрим товарларнинг импорти учун божхона тўловининг “нол” ставкасини узайтирган эди. Унга кўра, айрим қурилиш материалларининг импорти учун ҳеҳc қандай божхона тўлови ундирилмайди. Цемент ва унинг барча турлари, ёғош маҳсулотлари шулар жумласидандир. Мазкур ҳолатда божхона тўловининг “нол” стафкаси 2025 йилгача узайтирилган.