Birjaga chiqariladigan benzin hajmi ikki barobarga oshiriladi
Bu vaqtinchalik bo‘lib, barcha hududlarda zarur miqdorda zaxiralar yaratilgan.
1 daqiqa o‘qiladi
Kuni kecha sovuq havo oqimi natijasida ayrim hududlardagi AGTKShlar faoliyatiga qisqa muddatli cheklovlar kiritilayotgani haqida xabar bergan edik.
Birjadagi benzin hajmi ikki baravarga oshiriladi
Energetika vazirligi matbuot xizmatining ma’lum qilishicha, shundan kelib chiqib, birja savdolariga chiqarilayotgan avtobenzin hajmi vaqtinchalik ikki baravarga oshiriladi. Buning uchun barcha hududlarda zarur miqdorda zaxiralar yaratilgan.
Talabga qarab hajm yanada oshishi mumkin
Talab va taklifga qarab, benzin hajmini yanada oshirish imkoniyati mavjudligi ma’lum qilinadi. Iste’molchilar talabini to‘liq qondirish masalasi davlat nazoratiga olingan.
Joriy kuz-qish mavsumida mamlakat aholisini benzin bilan zarur miqdorda hamda uzluksiz ta’minlash yuzasidan barcha zaruriy choralar ko‘rilgani ta’kidlanadi xabarda.
Narxlarning asossiz ravishda oshirib yuborilishiga yo‘l qo‘yilmaydi
Bundan tashqari, xususiy avtozapravkalar egalaridan narxlarni sun’iy ravishda oshirmaslik, benzinni sifat va miqdor jihatidan to‘g‘ri sotish so‘ralmoqda.
Hozirgi vaqtda ishchi guruhlar tomonidan joylarda nazorat tadbirlari davom ettirilmoqda. Narxlarning asossiz ravishda oshirib yuborilishiga yo‘l qo‘yilmaydi.
