Toshkentda noqonuniy reklamalarni olib tashlash davom etmoqda: yuzlab bannerlar yo‘q qilindi
Mazkur tadbirlar shahar qiyofasini tartibga keltirish va jamoatchilikni bezovta qilayotgan tashqi reklamalardan xalos qilish maqsadida amalga oshirilmoqda.
1 daqiqa o‘qiladi
11-noyabr kuni Toshkentda noqonuniy tashqi reklamani olib tashlash bo‘yicha reyd o‘tkazildi. Bu haqda tuman hokimliklari matbuot xizmati xabar berdi.
Demontaj qilingan 120 dan ortiq reklama bannerlari
Mirobod tumanida Shahrisabz, Islom Karimov, Nukus va Farg‘ona yo‘li ko‘chalaridagi 120 dan ortiq reklama bannerlari va taxtalari demontaj qilindi. Reyd tuman hokimligi xodimlari tomonidan o‘tkazildi.
“Tadbir davomida o‘rnatilgan reklama konstruksiyalarining amaldagi me’yorlarga muvofiqligi sinchkovlik bilan tekshirildi,” — deyiladi hokimlik xabarida.
Yakkasaroy tumanidagi bannerlar
O‘z navbatida, Yakkasaroy tumanining Bobur va Nukus ko‘chalaridagi 16 qavatli uyning old tomonida joylashgan reklama banneri demontaj qilindi. Olib tashlash to‘g‘risidagi qaror aholi murojaatlari asosida o‘rganilib, vakolatli organlar tomonidan qabul qilindi.
Bundan tashqari, ko‘cha va magistral yo‘llar chetida joylashgan noqonuniy reklama konstruksiyalarini demontaj qilish bo‘yicha reyd Chilonzor tumanida ham o‘tkazildi.
Xususan, tuman Favqulodda vaziyatlar boshqarmasi xodimlari tomonidan ko‘p qavatli binolarning fasadlaridan reklama bannerlari olib tashlangan.
Poytaxtning boshqa tumanlari hokimliklari reydlar haqida ochiqchasiga xabar bermagan. Toshkent shahri hokimligi tekshiruv o‘tkazilganiga izoh bermadi.
Eslatib o‘tamiz, joriy yilning iyun oyida Toshkentda turar-joy binolaridagi mozaikalar reklama bannerlaridan tozalangandi. Jami 70dan ortiq mozaikalar tashqi to‘siqlardan xalos etilgan.
