Qashqadaryoda haydovchi voyaga yetmagan qizga nisbatan zo‘ravonlik qilgani aytilmoqda

“Nemolchi” jamoasi Qashqadaryo viloyatida voyaga yetmagan qiz H.D. (2007-yilda tug‘ilgan) taksi haydovchisi tomonidan hujumga uchragani va jinsiy tegajog‘likka duch kelgani haqida xabar berdi. Voqea ijtimoiy tarmoqlarda noroziliklarga sabab bo‘la boshlagach, Bolalar ombudsmani mazkur holatni nazoratga oldi.

Voqea tafsilotlari

Jabrlanuvchining so‘zlariga ko‘ra, voqea 26-oktyabr kuni sodir bo‘lgan. U dugonasi bilan ko‘rishib, taksida uyiga qaytayotganida, haydovchi unga shaxsiy savollar bera boshlagan va belgilangan yo‘nalishdan chiqib, qizni shahar tashqarisiga olib chiqqan. U yerda haydovchi qizning telefonini olib, unga tegajog‘lik qilishga urinib, zo‘rlashga harakat qilgan. Jabrlanuvchi yordam so‘rab qichqirganiga qaramay, haydovchi o‘z harakatlarini davom ettirgan. Qiz unga qarshilik ko‘rsatib, uyiga yetib olishiga imkon berishni so‘ragach, haydovchi uni shaharga qaytarishga rozi bo‘lgan va yo‘lda telefonini qaytarib, do‘st bo‘lib qolish sharti bilan qo‘yib yuborgan.

10 kun o‘tsa-da, haydovchi topilmagan

Voqea yuzasidan jabrlanuvchi darhol huquq-tartibot organlariga murojaat qilib, haydovchining mashina raqamini taqdim etgan. “Nemolchi”ga ko‘ra, qizning arizasi qabul qilinmagan va faqat og‘zaki tarzda chora ko‘rilishi aytilgan. Keyinchalik jabrlanuvchi yana militsiyaga borib ariza bermoqchi bo‘lganida, unga ariza yozish shart emasligi aytilib, haydovchini izlash ishlari olib borilayotgani haqida ma’lumot berilgan.

“Nemolchi” jamoasining xabar berishicha, voqea sodir bo‘lganidan beri 10 kun o‘tgan bo‘lsa-da, hali ham huquq-tartibot organlari haydovchini topa olmagan, jabrlanuvchidan rasmiy ariza olinmagan va sud-tibbiyot ekspertizasi ham tayinlanmagan.

Ombudsman munosabat bildirdi

Ushbu holatga javoban, Bolalar ombudsmani vaziyatni nazoratga olganini va qizning huquq va manfaatlarini himoya qilish maqsadida tergovga qadar tekshiruv jarayonini diqqat bilan kuzatayotganini ma’lum qildi. Ayni paytda, Qarshi tuman IIB Tergov bo‘limi tomonidan tekshiruv ishlari olib borilmoqda, va Bolalar ombudsmani voqeani diqqat bilan kuzatishda davom etmoqda. Mazkur ish bo‘yicha qo‘shimcha ma’lumotlar taqdim etiladi, deyiladi xabarda.