Google Trends: O‘zbekistonda iste’molchilarning xarid qilish qobiliyati oshmoqda

Iqtisodiy tadqiqotlar va islohotlar markazining 2024-yilga oid tahlillariga ko‘ra, O‘zbekiston iqtisodiyoti barqaror rivojlanmoqda. O‘sishning asosiy omillari sifatida sanoatning modernizatsiyasi, asosiy kapitalga investisiyalarning ortishi va xizmat ko‘rsatish sohasidagi faollik ko‘rsatildi.

Yuqori ishbilarmonlik ko‘rsatkichlari

Markaz tomonidan hisoblangan ishbilarmonlik faolligi indeksi (IFI) oktyabr oyida o‘tgan yilga nisbatan 33,8% ga oshdi. Noyabr oyida esa bu ko‘rsatkich 23,9% bo‘lib, o‘sish sur’atlari yuqoriligicha qoldi. Ayniqsa, sanoat, xizmat ko‘rsatish va infratuzilma tarmoqlaridagi faoliyat bu raqamlarni qo‘llab-quvvatladi.

Iste’molchilar va tadbirkorlar faolligi oshdi

Google Trends ma’lumotlariga ko‘ra, 2024-yilning IV choragida iqtisodiy faollik sezilarli oshgan. “Avtotransport vositalari” so‘rovlariga qiziqish 6,1%, “biznes va sanoat” 10%, “xaridlar” esa 12,8% ga ortgani qayd etilgan. Bu o‘zgarishlar iste’molchilarning xarid qilish qobiliyati va tadbirkorlik faolligining oshayotganidan dalolat beradi.

Barqaror iqtisodiyot uchun 3 omil

Markaz tahliliga ko‘ra, iqtisodiyotning barqaror o‘sishi uch asosiy omil bilan belgilanmoqda:

1. Sanoat rivoji: Ishlab chiqarish hajmining oshishi va infratuzilma modernizatsiyasi.

2. Investisiyalarning ko‘payishi: Yangi ish o‘rinlari yaratish va ishbilarmonlik muhitini yaxshilash.

3. Xizmat ko‘rsatish sohasining kengayishi: Iste’molchi va biznesga mo‘ljallangan xizmatlarning xilma-xilligi.

Xalqaro tashkilotlarning prognozlari ijobiy

Xalqaro valyuta jamg‘armasi, Jahon banki va Osiyo taraqqiyot banki O‘zbekistonning iqtisodiy o‘sishini 5,6–6,0% atrofida bo‘lishini kutmoqda. Bu prognozlar mamlakatda amalga oshirilayotgan tarkibiy islohotlar va investisiyalarga asoslangan.