Икки ойдан сўнг Криштиану Роналду Ўзбекистонга келади(ми)?

Куни кеча мамлакатимиз футбол клублари Осиёнинг энг кучли жамоалари ўртасида бўлиб ўтувчи ОЧЛ баҳсларида гуруҳ босқичининг сўнгги учрашувларини ўтказишди. ОКМК мағлубиятга учраб, ОЧЛдаги юришини тўхтатган бўлса, “Насаф” ва “Навбаҳор” плей-офф йўлланмасини қўлга киритди. “Пахтакор” турни якунловчи ўйинини бугун Тошкентда ўтказади. “Шерлар”нинг тақдири бошқа жамоалармиздан фарқли, ўз қўлида эмас.

Хўш, Роналдунинг ушбу маълумотларга нима алоқаси бор?

Криштиану Саудиянинг “Ан Насср” жамоасида тўп тепаётгани ҳақида яхши билсангиз керак. “Ан Насср” ҳам ОЧЛнинг плей-офф босқичига йўлланма олган. 28 декабрь куни мусобоқанинг нимчорак босқичига қуръа ташлаш маросими бўлиб ўтади. Регламентга кўра, жамоалар гуруҳ босқичида қайд этган натижаларидан келиб чиқиб, икки саватга ажратилади. Айни вақтдаги ҳолатга кўра саватлардаги кетма-кетлик қуйидагича кўриниш олмоқда: 

1-сават:

“Ал-Ҳилол” (Саудия Арабистони)

“Ан-Насср” (Саудия Арабистони)

“Ал-Иттиҳод” (Саудия Арабистони)

“Ал-Айн” (БАА)

2-сават:

“Насаф” (Ўзбекистон)

“Навбаҳор” (Ўзбекистон)

Айни вақтда икки ўрин учун курашаётган жамоалар: “Сепоҳон”, “Персеполис”, “Пахтакор”, “Ал-Файҳа”, “Ас-Садд”

50 %лик эҳтимоллар назарияси

Демак, биринчи саватдаги жамоалар иккинчи саватдагилар билан ўзаро рақиб бўлади. Навбатдаги босқичда бир гуруҳдан чиққан жамоалар ўзаро рақиб бўла олмаслигини инобатга олсак, Криштиану Роналду ҳаракатланаётган клуб эндиликда Ўзбекистон жамоаси билан рақиб бўлиши мумкин. Шу қаторда, Саудия клубининг яна бир бошқа юлдузлар ҳаракатланаётган жамоаси билан биргаликда Карим Бензема ҳам яна Ўзбекистонга ташриф буюриш эҳтимоли бор. Криштианунинг мамлакатимизга ташриф буюуриш эҳтимолини фоизларда ҳисобласак, ҳозирча бу кўрсаткич — 50%. Агарда бугунги учрашувлардан сўнг “Пахтакор” ҳам плей-офф йўлланмасини қўлга киритса, фоизлардаги рақам 75 га ўзгаради.