Parijda erishilgan natijalar bilan xotirjamlikka berilmaslik kerak — Shavkat Mirziyoyev

O‘zbekiston prezidenti raisligida o‘tkazilgan videoselektor yig‘ilishida sport sohasidagi yutuqlar, muammolar va kelgusi maqsadlar muhokama qilindi. Unda mamlakat sportining xalqaro maydondagi o‘rnini mustahkamlash, 2028-yil Los-Anjeles Olimpiya va Paralimpiya o‘yinlariga tayyorgarlik ko‘rish, ommaviy sportni rivojlantirish va sport federatsiyalarining samaradorligini oshirish bo‘yicha aniq topshiriqlar berildi.

Sport — millat genofondi

Prezident sportni shunchaki o‘yin yoki musobaqalar emas, balki millat genofondi, mamlakat qudrati va xalqaro maydondagi obro‘sini oshiruvchi eng ta’sirchan vositalardan biri sifatida ko‘rish kerakligini ta’kidladi. Shundan kelib chiqib, Olimpiya va Paralimpiya o‘yinlariga tayyorgarlik bo‘yicha ilk bor bunday yirik yig‘ilish o‘tkazildi.

O‘tgan to‘rt yil ichida sportni rivojlantirish uchun byudjetdan ajratilgan mablag‘ 1,5 trillion so‘mdan 3 trillion so‘mga oshirildi, murabbiylarning o‘rtacha maoshi ikki barobar ko‘paytirildi, 101 ta yangi yirik sport ob’ekti qurilib, 67 tasi rekonstruksiya qilindi. Ushbu islohotlarning samarasi sifatida O‘zbekiston sportchilari Parijda o‘tkazilgan musobaqalarda muvaffaqiyatli ishtirok etib, xalqaro arenada o‘z o‘rnini mustahkamladi.

Los-Anjeles–2028 uchun katta maqsadlar

Yig‘ilishda 2028-yilda Los-Anjelesda bo‘lib o‘tadigan Olimpiya o‘yinlarida O‘zbekiston delegatsiyasi kuchli o‘ntalikka kirishi kerakligi ta’kidlandi. Bunga erishish uchun sport federatsiyalaridan tortib viloyat hokimlarigacha barcha darajadagi mas’ullar jiddiy harakat qilishi lozimligi qayd etildi.

Prezident so‘zlariga ko‘ra, O‘zbekistonning Olimpiya o‘yinlaridagi yutuqlari hozircha faqat yakkakurash sport turlari bilan cheklangan. Parij Olimpiadasida faqatgina boks, dzyudo, taekvondo, og‘ir atletika va erkin kurash bo‘yicha medallar qo‘lga kiritilgan. Lekin Olimpiya dasturida jami 48 ta yengil atletika yo‘nalishi mavjud bo‘lsa-da, so‘nggi Olimpiadada O‘zbekiston faqat 5 ta litsenziya qo‘lga kiritgan.

Sport federatsiyalarining faoliyati tanqid qilindi

Mamlakatda sportga qaratilgan katta e’tiborga qaramay, ayrim federatsiyalar mavjud imkoniyatdan samarali foydalana olmayotgani tanqid qilindi. Masalan, badmintonda birorta ham litsenziya olinmagan, kamondan otishda atigi 3 ta litsenziya qo‘lga kiritilgan. Yadro, disk va nayza uloqtirish, sakrash kabi sport turlarida esa natijalar umuman yo‘q.

Suv sporti bo‘yicha 49 ta dastur bo‘lishiga qaramay, O‘zbekiston faqat 4 ta litsenziya olgan. O‘q otish bo‘yicha barcha sharoit yaratilgan bo‘lsa-da, hech bir sportchi Olimpiadaga yo‘llanma olmagan. Yunon-rum kurashida atigi 3 ta litsenziya bor. 2023-yilda O‘zbekistonda ilk bor baydarka va kanoeda eshkak eshish bo‘yicha jahon chempionati o‘tkazilgan bo‘lsa-da, hech qanday medal qo‘lga kiritilmagan.

Hududlardagi sustkashlik va hokimlarning beparvoligi

Sport sohasida eng katta muammolardan biri sifatida mahalliy hokimiyatlarning sust ishlayotgani qayd etildi. Ba’zi viloyat hokimlari o‘z hududidagi sport federatsiyalari rahbarlarini tanimasligi, sportchilar va murabbiylar bilan uchrashmasligi, natijalarni faqat xalqaro musobaqalarda g‘alaba qozonilganidan keyingina bilib olishi tanqid qilindi.

O‘tgan yili jahon chempionatlarida O‘zbekiston sportchilari 58 ta medal qo‘lga kiritgan bo‘lsa, Navoiy, Surxondaryo va Qashqadaryo viloyatlaridan hech bir sportchi medal ololmagan. Parij Olimpiya va Paralimpiya o‘yinlariga qo‘lga kiritilgan litsenziyalar bo‘yicha ham Navoiy va Qoraqalpog‘iston viloyatlari eng past natijani qayd etgan.

Sportni rivojlantirish bo‘yicha yangi tizim joriy etiladi

Yig‘ilishda yoshlarni sportga, ayniqsa, Olimpiya sport turlariga tayyorlash va seleksiya qilish, iqtidorli sportchi va murabbiylarni rag‘batlantirish bo‘yicha mutlaqo yangi tizim yaratish zarurligi qayd etildi.

Sport federatsiyalarining ishini baholash mezonlari yangilanadi. Endilikda sportdagi adolat, sportchi va murabbiylar uchun manfaatlar yaratish hamda raqamlashtirish jarayonlari asosiy mezonlardan biri bo‘ladi.