UzAuto Motors янгиланган Chevrolet Traverse ва Tahoe моделларига сотув бошланганини эълон қилди

UzAutoMotors компанияси 3 мартдан бошлаб янгиланган Chevrolet Traverse ва Chevrolet Tahoe’нинг 2022 йилги моделлари учун шартнома тузишни бошлади.

Chevrolet Tahoe 2022

Узунлиги беш метрдан ошиқ бўлган автомобиль замонавий 5,3 литрли двигатель ҳамда 10 поғонали автоматик узатмалар қутиси билан жиҳозланган. Chevrolet Tahoe двигатели 343 от кучига эга бўлиб, 512 Нм максимал айланиш моменти 8 сонияда 100 километр/соатгача тезланиш имконини беради.

Chevrolet Tahoe Magnetic Air Ride Control пневматик осма тизим билан жиҳозланган. Автомобиль ҳар қандай шароитда қўлланилишидан қатъи назар қулай ҳаракатланишни таъминлайди. Автоматик круиз-контрол тизими автомобилни ҳаракатланиш қаторида ушлаб туриб, доимий барқарорлигини таъминлайди ҳамда тўсатдан тўсиқ пайдо бўлганда автоматик тарзда тормоз тизимини фаоллаштиради.

Янги Chevrolet Tahoe 10,2 дюмли сенсорли ахборот-кўнгилочар экранига эга. Шунингдек, унга 9 та калонкадан иборат премиум Bose динамиклари уланган. Экранда автомобиль ҳолатини 360 градусда кўриш мумкин. Мазкур моделнинг нархи (ҚҚСсиз):

• Бошланғич комплектация: 597 687 427 сўмдан.
• RST AT MY22 комплектация: 947 499 999 сўм.

Chevrolet Traverse 2022

Traverse 3,6 литрли V6 двигатели 318 от кучига эга бўлиб, 7.6 сонияда 100 километр/соатгача тезланиш билан автомобилни қулай бошқаришни ҳамда ёқилғи тежамкорлигини таъминлайди. Етти ўриндиқли автомобиль қулайлик учун энг сўнгги функциялар билан бирга кўнгилочар ҳамда хавфсизлик бўйича энг илғор технологияларни таклиф этади.

Рангли 8 дююмли сенсор экран 10 та калонкадан иборат премиум Bose динамикли мултимедиа тизимига эга. Мазкур моделнинг нархи (ҚҚСсиз):

• Бошланғич комплектация: 469 211 034 сўмдан.
• Premiyer AT MY22 комплектация: 647 600 000 сўм.

«Бошланғич комплектацияли автомобилни сотиб олиш истагида бўлган харидорлар, компаниянинг расмий дилерларида ариза қолдириши ёки расмий сайти info@uzautomotors.com орқали онлайн тарзда ариза юбориши мумкин. Тўпланган аризаларнинг сонига қараб, компания ушбу автомобилнинг етказилиб берилишини таъминлайди», — дейилади хабарда.

Аввалроқ Шавкат Мирзиёев йиғилишда Вазирлар Маҳкамасига уч кун ичида автомашиналар импорти учун божхона тўловларини 2 баробарга камайтириш, автомобиллар нархини 5 фоизга арзонлаштириш, маҳаллийлаштириш даражасини 48 фоиздан 56 фоизгача ошириш бўйича қарор лойиҳасини ишлаб чиқиш топшириғини берганди. Шунингдек, президент 1 майга қадар автомобиль сотиб олишдаги навбатларни тўлиқ бартараф этиш, UzAuto Motors автомобиллари учун олдиндан тўловни 85 фоиздан 50 фоизга камайтириш вазифасини ҳам қўйган.