Eng qimmat va eng arzon uylar respublikaning qaysi hududida?

2025-yilni yakunlab, O‘zbekistonning ko‘chmas mulk bozori o‘zining dinamik o‘sishi va yangi tendensiyalari bilan diqqatni tortdi. Bunda nafaqat poytaxt Toshkent, balki viloyatlardagi bozor ham keskin o‘zgargan.

Shartnomalar soni ortib, uy-joy narxlari o‘zgarib, yangi tendensiyalar yuzaga keldi. Ushbu yilgi statistikalar nafaqat poytaxtda, balki mintaqalarda ham o‘sishning guvohi bo‘ldi. Buxoro, Sirdaryo va Samarqand kabi viloyatlar o‘zlarining ko‘chmas mulk bozorida o‘ta faollikni namoyish etishdi.

Quyida 2025-yil yakunlari bo‘yicha ko‘chmas mulk bozori haqida batafsilroq tahlilni taqdim etamiz.

295 mingta uy oldi-sotdisi

2025-yil yakunlariga ko‘ra, respublikada uy-joy oldi-sotdi shartnomalari soni 295 mingta bo‘lib, bu o‘tgan yilga nisbatan 15 foizdan ortiq o‘sishni ko‘rsatdi.

Hududlar bo‘yicha faollikning eng yuqori o‘sishi Buxoro (25,7 foiz), Sirdaryo (23,3 foiz) va Samarqand (19,7 foiz) viloyatlarida kuzatildi. 2025-yilda respublikada uy-joy oldi-sotdi bitimlarining taxminan 30 foiz poytaxt bozorida amalga oshdi. Toshkent shahrida esa savdo hajmi 18,2 foizga ortib, 84 mingdan ortiq bitimni tashkil etdi.

Poytaxtda uylar 9 foizga qimmatladi

Toshkent shahrining ikkilamchi uy-joy bozorida o‘tgan yil davomida bir kvadrat metrning o‘rtacha qiymati 0,6 foizga oshib, $1100 dan yuqori bo‘ldi. Biroq, Mirzo Ulug‘bek va Chilonzor tumanlarida narxlar sezilarli darajada (taxminan 5foiz) pasaydi.

Shu bilan birga, poytaxtning birlamchi uy-joy bozorida narxlar ancha ko‘tarildi va uy-joyning o‘rtacha qiymati 9 foizga oshdi. Toshkentda eng yuqori narx o‘sishi Mirobod (18 foiz), Yashnobod (14 foiz) va Mirzo Ulug‘bek (13,5 foiz) tumanlarida kuzatildi.

Ijara narxlarichi?

Ijara narxlari poytaxtning markaziy tumanlarida, xususan Shayxontohur, Mirobod va Yakkasaroy tumanlarida bir kvadrat metr uchun $11 atrofida bo‘lib qolgan. Ijara narxlarining o‘sish sur’ati eng yuqori bo‘lgan hududlar Olmazor, Yashnobod va Shayxontohur tumanlari bo‘lib, bu yerda yillik o‘rtacha o‘sish 11 foizga yetgan.

Respublika bo‘yicha kkilamchi uy-joy bozori

2025-yilda ko‘chmas mulk ikkilamchi bozorida narxlar o‘sish sur’atining mo‘tadil tezlashgani kuzatildi. Mamlakat bo‘yicha o‘rtacha narxlar 8 foizga oshdi, 2024-yilda esa bu ko‘rsatkich 6,2 foiz edi. Narxlar eng yuqori o‘sish sur’atlari Surxondaryo, Farg‘ona viloyatlari va Qoraqalpog‘iston Respublikasida kuzatildi, bu hududlarda uy-joy narxlarining o‘rtacha yillik o‘sishi 17 foizga yetdi.

Yil yakunlariga ko‘ra, ikkilamchi uy-joy bozorida eng yuqori narxlar poytaxtda saqlanib qolgan. Samarqand viloyatida bir kvadrat metr narxi $834, Toshkent viloyatida esa $682 ga teng bo‘ldi. Eng past narxlar esa Qoraqalpog‘iston Respublikasida qayd etilib, bir kvadrat metrning o‘rtacha qiymati $378 ni tashkil etdi.

Shuningdek, nisbatan past narxlar Sirdaryo va Qashqadaryo viloyatlarida ham kuzatilib, buralarda bir kvadrat metrning o‘rtacha narxi $454 bo‘lgan.