Osiyoning o‘zbekistonlik eng yaxshi yosh o‘yinchisiga Ispaniya va Fransiyadan qiziqishlar bo‘lmoqda

Ma’lumotlarga ko‘ra, O‘zbekiston milliy jamoasi hamda SSKA klubi yarimhimoyachisi Abbosbek Fayzullayevga Fransiya chempionatining “Monako” hamda Ispaniya LaLigasining “Real Sosiyedad” jamoalaridan qiziqish bo‘lmoqda. 

Fransiya klubi qiziqishi

Klub Abbosbek Fayzullayev uchun 15 million yevro to‘lashga tayyor. “Agar Abbosbek Fayzullayevga “Monako”dan shunday taklif tushadigan bo‘lsa, o‘ylab o‘tirmay ketishi kerak. SSKAning o‘zi ham buncha mablag‘ evaziga uni qo‘yib yuborishi aniq. Bugungi sharoitda 15 million yevro – katta pul. Namuna uchun uzoqqa bormaylik, “Monako”da o‘ynayotgan Aleksandr Golovin yaqqol misol. Agar bu transfer amalga oshsa, Fayzullayev uchun top-ligaga yo‘l ochiladi” — deydi Rossiya terma jamoasi va “Selta” klubi sobiq futbolchisi Aleksandr Mostovoy. Ushbu taklifga qaramay SSKA klubi qishki transfer oynasida Fayzullayevni sotib yuborishni istamayapti, klub futbolchi bilan xayrlashishga tayyor emas.

“Real Sosiedad” qiziqishi

Yana bir manba Metaratingsning e’lon qilgan axborotiga ko‘ra, sirdaryolik yosh futbolchiga Ispaniyaning “Real Sosiedad” jamoasi ham qiziqish bildirmoqda. Qiziqarlisi, futbolchining o‘zi ham intervyularida ispan futbolini o‘zi uchun ma’qul ko‘rishini va ispan tilini o‘rganayotganini ma’lum qilgan. Agarda moliyaviy tomonlama kelishuvlar o‘z o‘rnida bo‘lsa, futbolchi ko‘p ehtimol Ispaniya jamoasi taklifini tanlashi mumkin.

Fayzullayev transferi

Fayzullayev o'tgan yozda "Paxtakor"dan "SSKA"ga transfer qilingandi. Futbolchining ushbu klub bilan shartnomasi 2026-yilning yoziga qadar tuzilgan va shartnomani 12 oyga uzaytirish imkoni mavjud. Ushbu transfer 500 ming yevroga baholangan. Ilk mavsumning o'zidayoq o'zini ko'rsatgan legionerimizni Transfermarkt portali bugungi kunda 6 mln. yevroga baholamoqda.

Futbolchi haqida

Abbosbek Fayzullayev 2003-yilning 3-oktyabr sanasida tug‘ilgan. Ayni paytda Abbos O‘zbekistondagi eng qimmat futbolchi hisoblanadi. Transmarket portali unga 6 million yevro narx belgilagan. Fayzullayev yakunlanayotgan mavsum Rossiya chempionati va kubogida 13 ta o‘yin o‘tkazdi. Mazkur o‘yinlarda 2 ta gol urdi va 5 ta golli uzatma amalga oshirdi. Timur Kapadze jamoasining asosiy “figura”laridan biri bo‘lgan Abbosbek U23 Osiyo chempionatida 3 ta o‘yin o‘tkazdi va 1 ta golli uzatma amalga oshirdi. Shuningdek, u Olimpiyada o‘yinlarida terma jamoamiz bilan birga barcha o‘yinlarda maydonga tushgan. 

Ma'lumot uchun, O‘zbekiston milliy terma jamoasi va Rossiyaning SSKA klubi a’zosi 29-oktyabr kuni Osiyo futbol konfederatsiyasi tomonidan qit’a futbolining eng yaxshilarini taqdirlash marosimida yilning eng yaxshi yosh futbolchisi, deb e’tirof etilib, maxsus sovrin bilan taqdirlandi.