Ўзбекистонда туризм: Дам олиш ва саёҳат асосий мақсад эмас

Маълумотларга кўра, 2023 йилда қарийб 7 миллионга яқин одам Ўзбекистонга келган. Уларнинг мақсадлари эса турлича. 

 Энг кўп ташриф буюрувчилар қариндошлар

Статистика агентлиги берган маълумотларига кўра, 2023 йил давомида 6,6 млн. нафар чет эл фуқаролари туристик мақсадларда мамлакатимизга ташриф буюрган.

Асосий ташриф буюрувчилар эса республика ҳудудида қариндоши борларни йўқлаш мақсадида келганлар бўлган. Уларнинг сони 5,6 миллион кишини ташкил қилади. Рақамларнинг асосий кесими эса қўшни давлатдан келганлардир. 

Энг кам кўрсаткич таълим соҳасида

Шунингдек, Ўзбекистонга 16,8 минг киши ўқиш мақсадида келган бўлиб, ташриф буюрганлар қаторида энг қуйи поғонада турибди. 

Ташриф буюрувчилар қаторида дам олиш мақсадида келганлар иккинчи ўринда турибди. Уларнинг сони эса 773,2 минг кишини ташкил қилади.

Қолган кесимлари

Бундан ташқари, Ўзбекистонга хизмат юзасидан 143,5 минг киши, тижорат мақсадида 70,4 минг киши, даволаниш учун эса 61,3 минг киши ташриф буюрган.

Унда давлатлар улуши қандай?

Куни кеча мамлакатга ташриф буюрган туристлар ҳақида хабар бергандик. Шунингдек, унда қайси давлатдан қанча одам келганлиги ҳақида ҳам ёритилган. Унга кўра, биринчи ўринда Россия 782,0 минг; иккинчи ўринда Туркия 152,1 минг; учинчи ўринда Ҳиндистон 48,0 минг; Хитой 45,0; Жанубий Корея 40,2 минг; Германия 33,3 минг; Италия 28,6 минг; АҚШ 25,3 минг; Франция 21,0 минг; Исроил 17,2 минг; Буюк Британия 18,0 минг; Эрондан эса 7,1 минг нафар сайёҳ ташриф буюрган.