Тест синовлари учун 3 соат вақт бериладиган бўлди

Аввалроқ Давлат тест маркази раҳбари бу йилги имтихонларда абитуриентларга тестларни ечишга 3 соат эмас, 2 соат вақт беришини айтганди.

Бугун Ўзбекистон Республикаси таълим муассасаларига ўқишга қабул қилиш бўйича Давлат комиссияси мажлисининг 2-сон баёни тасдиқланди.

Унга кўра, Олий таълим муассасаларининг бакалавриат таълим йўналишларига кириш тест синовлари Қорақалпоғистон Республикаси, вилоятлар ва Тошкент шаҳрида жойлашган марказий стадионларда, қоида тариқасида, кунига икки сменада ўтказилади.

Бунда, ҳар 30 та тест топшириғини ечиш учун (жавоблар варақасини тўлдириш билан бирга) 90 дақиқа вақт ажратилади (60 та тест топшириғига жами 180 дақиқа).

Шундай қилиб, имтихонларда бериладиган вақт ўзгаришсиз қолдирилди.