«Темир дафтар» нима? Унга кимлар киради?

Бугун АОКА ҳузуридаги штабда бўлиб ўтган брифингда Маҳалла ва оилани қўллаб-қувватлаш вазирлиги ахборот хизмати раҳбари Саодат Боймирзаева халқ тилида “темир дафтар” деб юритиладиган эҳтиёжман оилалар рўйхати билан боғлиқ бир қатор саволларга жавоб берди:

«Темир дафтар» — карантин шароитида ишсиз, даромадсиз қолган эҳтиёжманд, ёрдамга муҳтож оилаларнинг маҳаллада шакллантирилган шаффоф рўйхати;

«Темир дафтар» ўз навбатида фуқаролар йиғинлари раисининг сектор ва ҳудуд раҳбари билан ҳамкорликдаги фаолиятини мустаҳкамлайди;

«Темир дафтар»ни юритишда эҳтиёжманд оилаларнинг 7 тоифаси, жумладан:

— кам таъминланган;

— ногиронлиги бўлган;

— ижтимоий ҳимояга муҳтож оилалар;

— якка-ёлғиз кексалар;

— доимий ишсиз фуқаролар;

— карантин туфайли ишсиз қолган фуқаролар;

— оғир эпидемиологик ҳудудлардан қайриб келинган фуқароларни камбағалликдан чиқариш чоралари кўрилади.

Масъул ходимлар ўзининг кунлик амалга оширган ишлари юзасидан «Темир дафтар»идаги маълумотларни saxovat.argos.uz сайтига рақамли имзо калити орқали электрон шаклда киритиб боради;

 «Темир дафтар»га тушган оиланинг ҳеч бўлмаганда битта аъзосини жорий йилда иш билан таъминланиб, шу орқали уларни муҳтожликдан чиқариш чоралари кўрилади.

Эслатиб ўтамиз, аввалроқ Тошкент шаҳар ҳокимлиги матбуот хизмати раҳбари Фурқат Маҳмудходжаев Ёрдам пуллари фақат «темир дафтар»га киритилганларга тарқатилганини маълум қилганди.