Июль ойида президент ишдан олган мулозим яна лавозимга қайтди

Июл ойида президент раислигида ўтказилган видеоселекторда сусткашлик ва хиёнат қилишда айбланиб ишдан олинган “Ўзбекистон темир йўллари” собиқ раиси яна шу компания лавозимига тайинланди.

“хиёнат қилганга ўрин йўқ”

11 июль куни Президент Шавкат Мирзиёев ўзи раислигида инвестициялар жалб қилишни янада кенгайтириш бўйича қўшимча чора-тадбирлар юзасидан видеоселектор йиғилишида бир қатор раҳбарларни ишдан олганди. Улар қаторида “Ўзбекистон темир йўллари” собиқ раиси Ҳуснутдин Ҳосилов мавжуд эди. Президент матбуот котибининг расмий саҳифасида қайд этилишича, 11 июль ҳолатига кўра темир йўлда 2,5 мингта юк вагони етишмаслиги, мавжуд вагонларнинг 3,5 мингтаси эса таъмирталаблигига қарамай, уларни кўпайтириш, йўлларни модернизация қилиш учун бор-йўғи 16 миллион доллар тўғридан-тўғри инвестиция ўзлаштирган.

Шу сабабли, инвестицияларни жалб қилиш ва уларни ўзлаштиришда сусткашликка йўл қўйганликлари учун бир қатор раҳбарлар орасида Хосилов ҳам лавозимидан озод этар экан, “хиёнат қилганга ўрин йўқ”, дея қўшимча қилган. Тўлиқроқ тушунилиши учун, “Мен ишлаган, хато қилган одамни кечираман, лекин хиёнат қилган одамни ҳеч қачон кечирмайман”, — деган давлат раҳбари.

Кутилмаган қайтиш

Куни кеча Ҳуснутдин Хосиловнинг “Ўзбекистон темир йўллари” акциядорлик жамияти бош муҳандиси этиб тайинлангани ҳақида компания матбуот хизмати хабар берди. 

Маълумот учун, Ҳуснутдин Хосилов 1970 йилда Тошкент вилоятида туғилган. 1992 йилда Тошкент темирйўл муҳандислари институтини инженер-механик мутахассислиги бўйича тамомлаган.

Меҳнат фаолияти давомида «Ўзинтерсервис» қўшма корхонаси, «Ўзтемирйўлмаштаъмир» унитар корхонаси, «Ўзбекистон темир йўллари» ДАТК, Вазирлар Маҳкамаси департаментида турли лавозимларда ишлаган. 2016 йил апрелдан “Ўзбекистон темир йўллари” акциядорлик жамиятининг бош менежер — бош муҳандиси лавозимида ишлай бошлаган. У 2019 йилнинг февралида 2002 йилдан буён компания бошқарув раиси сифатида ишлаб келган Очилбой Раматов ўрнини эгаллаган.