Sulh uzaytirildi, ammo muzokaralar barbod bo‘lmoqda: AQSH va Eron vaziyatni keskinlashtirishni kechiktirdi

AQSh va Eron o‘rtasidagi vaqtinchalik sulh muddati yana bir bor uzaytirildi. Prezident Donald Trampning ma’lum qilishicha, o‘t ochishni to‘xtatish rejimi Tehron “yagona taklif” taqdim etguniga qadar va muzokaralar yakunlanmaguncha amalda bo‘ladi.

Trampning so‘zlariga ko‘ra, sulhni uzaytirish qarori Eron rahbariyatidagi ichki ixtiloflar fonida — Pokistonning iltimosiga binoan qabul qilingan. Xususan, Pokiston armiyasi qo‘mondoni Osim Munir va Bosh vazir Shahboz Sharif tegishli murojaat bilan chiqqan.

Shunga qaramay, Vashington qat’iy pozitsiyada qolmoqda: Tramp Amerika qurolli kuchlari Hurmuz bo‘g‘ozi blokadasini davom ettirishi va to‘liq jangovar shaylik holatida qolishini tasdiqladi.

Eron muzokaralardan chiqmoqda

Trampning bayonotidan biroz avval “Tasnim” agentligi Tehronning Islomoboddagi muzokaralarning ikkinchi raundida ishtirok etishdan bosh tortgani haqida xabar berdi.

Oliy rahbariyat muloqotni davom ettirishga ruxsat berganiga qaramay, Eron tomoni muzokaralarni ma'nosiz deb hisobladi. Tehrondagilar Vashington “haddan tashqari yuqori talablar” qo‘yayotganini va har qanday oqilona kelishuvni amalda to‘sib qo‘yayotganini ta’kidlamoqda.

Vensning tashrifi bekor qilindi

Shu bilan bir qatorda, AQSh vitse-prezidenti Jey Di Vensning Islomobodga rejalashtirilgan tashrifi bekor qilingani ma’lum bo‘ldi. Axios nashri ma’lumotlariga ko‘ra, safar noma’lum muddatga qoldirilgan, keyinchalik bu ma’lumot Oq uy tomonidan ham tasdiqlandi.

Eslatib o‘tamiz, muzokaralarning birinchi bosqichida Amerika delegatsiyasiga aynan Vens boshchilik qilgan edi. Delegatsiya tarkibidan, shuningdek, maxsus vakil Stiven Uitkoff va Jared Kushner ham joy olgan. Eron delegatsiyasiga esa parlament spikeri Muhammad Baqer G‘olibof va TIV rahbari Abbos Aroqchi vakillik qilgan edi.

Muzokaralar muvaffaqiyatsizlikka uchradi — keskinlik ortmoqda

Muloqotning birinchi raundi natijasiz yakunlandi. Shundan so‘ng, ertasigayoq Tramp Hurmuz bo‘g‘ozi blokadasi boshlanganini e’lon qildi, Tehron esa o‘z navbatida AQShni sulhni buzishda aybladi.

Hozircha harbiy harakatlardagi tanaffus saqlanib turibdi, biroq diplomatik jarayon amalda boshi berk ko‘chaga kirib qolgan.