Afsona qaytmoqda: Subway Surfers 2 qachon chiqadi?

Bir vaqtlar oddiy mobil o‘yin sifatida boshlangan, ammo butun dunyoni rom etgan Subway Surfers yangi davrga qadam qo‘ymoqda. Mobil geyming tarixida alohida o‘rin egallagan ushbu loyiha endi nafaqat davom etadi, balki tubdan yangilangan konsepsiya bilan o‘yinchilarga qaytmoqda.

Rasmiy e’lon va reliz sanasi

Mashhur franshizaning yangi qismi Subway Surfers City nomi ostida rasman taqdim etildi. O‘yinning muallifi bo‘lgan SYBO studiyasi ma’lumotiga ko‘ra, loyiha 26-fevral kuni iOS va Android platformalarida ishga tushiriladi. Ishlab chiquvchilar bu galgi relizni klassik o‘yinning zamonaviy talqini sifatida ta’riflamoqda.

Yangi makon: yagona, tirik megapolis

Yangi qismda eng katta o‘zgarish o‘yin makonida kuzatiladi. Avvalgi Subway Surfers qismlarida o‘yinchilar dunyoning turli shaharlarida yugurishgan bo‘lsa, endilikda barcha voqealar Subway City deb nomlangan yagona, doimiy megapolisda kechadi. Ushbu shahar ko‘p madaniyatli, jonli va dinamik muhit sifatida ishlab chiqilgan.

To‘rtta hudud — to‘rtta o‘ziga xos atmosfera

Subway City to‘rtta asosiy hududga bo‘lingan. Doki sanoat va port muhitini aks ettirsa, Sautline zamonaviy shahar ko‘chalarini namoyon etadi. Sunrise Boulevard yorqin va futuristik kayfiyatga ega bo‘lsa, Delorian Park yashil hudud va dam olish makoni sifatida tasvirlangan. Har bir hudud o‘ziga xos dizayn, tezlik va to‘siqlar bilan ajralib turadi.

O‘yin jarayonidagi innovatsiyalar

O‘yin jarayoni ham sezilarli darajada boyitilgan. Subway Surfers City’da tezlikni oshiruvchi maxsus panellar, to‘siqlarni yorib o‘tishga imkon beruvchi stomp zarbasi hamda sakrash vaqtida himoyalanishni ta’minlovchi qalqon mexanikasi paydo bo‘ladi. Bu yangiliklar o‘yinni yanada dinamik va strategik qiladi.

Uch xil rejim — uch xil tajriba

Yangi loyihada uchta asosiy o‘yin rejimi mavjud. An’anaviy cheksiz yugurish klassik muxlislar uchun saqlab qolingan. Shuningdek, topshiriqlar va bosqichlardan iborat “Shahar bo‘ylab tur” syujet rejimi hamda vaqt bilan cheklangan maxsus sinovlarni taklif qiluvchi “Voqealar rejimi” joriy etilgan.

Mavsumiy yangilanishlar va doimiy rivoj

Ishlab chiquvchilar Subway Surfers City uzoq muddatli loyiha bo‘lishini ta’kidlamoqda. Har bir yangi mavsumda shahar kengayib boradi, o‘yinga yangi hududlar, qahramonlar, liboslar va xoverbordlar qo‘shiladi. Bu esa o‘yinchilarning qiziqishini doimiy saqlab turishga qaratilgan.

Rekordlar bilan yozilgan tarix

Ma’lumot o‘rnida, Subway Surfers ilk bor 2012-yilda taqdim etilgan va qisqa vaqt ichida mobil o‘yinlar tarixidagi eng ommabop loyihalardan biriga aylangan. Rasmiy statistikaga ko‘ra, o‘yin bugunga qadar 4,5 milliard martadan ortiq yuklab olingan. Hozir ham uning oylik faol auditoriyasi 100–150 million foydalanuvchini tashkil etadi.

Eski ruh, yangi tezlik

Subway Surfers City ushbu muvaffaqiyatli tarixni yangi bosqichga olib chiqishni maqsad qilgan. Endi o‘yinchilar metro yo‘laklaridan chiqib, butun bir shahar ritmida yugurishga tayyor.