Mobil internet tezligi reytingi

“Speedtest Global Index” internet tezligi bo‘yicha dunyo davlatlari hamda shaharlari reytingini e’lon qildi.

TOP-10 shaharlar

Unga ko‘ra, fors ko‘rfazidagi arab mamlakatlari va shaharlari dunyoda eng tez mobil internetdan foydalanmoqda.

Eng yaxshi mobil internetga ega shaharlar:

1.    Ar-Rayyan (Qatar) — 417,17 Mbit/s;

2.    Dubay (BAA) — 336,57 Mbit/s;

3.    Abu-Dabi (BAA) — 296,03 Mbit/s.

Top-10 ga kirgan shaharlar: Lissabon, Doha, Kopengagen, Ar-Riyod, Oslo, Shanxay, Pekin.

Gavanaliklar 4,6 megabit/soniya tezlikdagi mobil internet bilan reytingda so‘nggi 178-o‘rinda qayd etdi.

O‘zimizning shaharlarda nima gap?

Reytingda mamlakatimizning Samarqand shahri o‘zining o‘rnini 5 pog‘onaga yaxshilab 101-o‘rnida turibdi. Unga ko‘ra, samarqandliklar 39,98 Mbit/s internetdan foydalanmoqda.

Poytaxt Toshkent esa reytingda 106-o‘rin bilan 7 pog‘onaga pastlagan. Toshkent shahridagi internet tezligi soniyasiga 38,09 megabit tezlikni ko‘rsatyapti.

Mamlakatlar TOP-10 taligi

Eng yaxshi mobil internetga ega mamlakatlar reytingida ham shaharlar reytingiga mos ravishda arab mamlakatlari yetakchilik qilmoqda:

1.    Qatar — 286,42 Mbit/s;

2.    BAA — 284,21 Mbit/s;

3.    Quvayt — 216,96 Mbit/s.

Kuchli 10 talikning qolgan o‘rnini esa Janubiy Koreya, Daniya, Xitoy, Norvegiya, Islandiya, Niderlandiya, Saudiya Arabistoni egallab turibdi.

Mamlakatlar reytingining eng quyi pog‘onasini Sharqiy Timor band qilgan, ya’ni 155-o‘rin. Unga ko‘ra, mamlakatdagi o‘rtacha internet tezligi 3,34 Mbit/s.

Markaziy Osiyo davlatlari

Markaziy Osiyoda reyting bo‘yicha eng yuqori tezlik  Turkmanistonga tegishli bo‘lib turibdi. U reytingda 37,23 Mbit/s tezlik bilan 69-o‘rinda turibdi. Qozog‘iston esa oldingi e’lon qilingan natijalardan buyon o‘zining o‘rnini 1 pog‘onaga boy bergan, ya’ni 71-o‘rin (35,71 Mbit/s). Uchinchi o‘rinda esa Qirg‘iziston soniyasiga 27,25 megabit tezlik bilan o‘rin olgan. Uning reytingdagi natijasi 4 taga yaxshilani, 93-o‘ringa ko‘tarilgan.

O‘zbekistonda cho‘kish

Shuningdek, O‘zbekiston “Speedtest Global Index” reytingida 101, Markaziy Osiyoda esa 4-o‘rinni egallamoqda. Mamlakatimiz reytingda 7 pog‘ona pastga tushib, 26,24 megabit/soniya internet tezligiga ega.

Tojikistonliklar esa 8,14 Mbit/s internet tezligini ishlatishar ekan. Bu bilan Tojikiston reytingning 151-o‘rnidan joy oldi.