Yolg‘iz sayohat qilsa bo‘ladigan davlatlar reytingi e’lon qilindi: O‘zbekiston Qirg‘izistondan 4 pog‘ona pastda

“Much Better Adventures” xalqaro sayohat platformasi yakkaxon sayohatchilar uchun mo‘ljallangan “Solo Travel Index 2026” reytingini e’lon qildi. Mazkur ro‘yxat shunchaki madaniy obidalarni tomosha qilish yoki shaharda hordiq chiqarish bilan cheklanmay, faol va sarguzashtli hordiqni afzal ko‘radigan sayyohlar uchun maxsus tuzilgan.

Reyting qanday shakllantirildi?

Tashkilotchilarning ta’kidlashicha, yakkaxon sayohatlar uchun yo‘nalish tanlashda ko‘pincha infratuzilmasi rivojlangan va tili tanish bo‘lgan davlatlarga ustuvorlik beriladi. Biroq bu yondashuv sayohatchilarni noyob va bokira tabiat burchaklarini kashf etish imkoniyatidan cheklashi mumkin.

Reytingni tuzishda platforma ekspertlari qulaylik hududidan chiqishga undaydigan va unutilmas sarguzashtlarni taqdim eta oladigan manzillarga alohida e’tibor qaratdi. Baholash jarayonida quyidagi asosiy ko‘rsatkichlar va mezonlar hisobga olindi:

• Tinchlik indeksi (GPI): Xavfsizlik darajasi 5 ballik shkala bo‘yicha baholandi (ball qanchalik past bo‘lsa, hudud shunchalik tinch va xavfsiz hisoblanadi);
• Mahalliy oshxona xarajatlari: Bir kishilik tushlikning o‘rtacha narxi orqali byudjet imkoniyatlari tahlil qilindi;
• Kirish qulayligi: Buyuk Britaniya va AQShdan tashrif buyuradigan sayohatchilar uchun viza hamda rasmiylashtirish tartiblarining soddaligi;
• Biomilliylik va tabiat salohiyati: Hududning yovvoyi olami hamda xilma-xil tabiat imkoniyatlari;
• Piyoda sayohat (hayking) marshrutlari: Marshrutlarning ommabopligi hamda ulardagi gavjumlik darajasi;
• Sayohatchilar taassurotlari va talab: Amaldagi sayohatchilarning fikrlari, shuningdek, 2025–2026 yillar uchun yakkaxon sayohatlar bo‘yicha buyurtmalar dinamikasi va ekspertlar xulosalari.

Top-10 talik: Markaziy Osiyo davlatlarining o‘rni

E’lon qilingan kuchli o‘nlikdan Markaziy Osiyoning ikki davlati joy oldi. Quvonarlisi, Qirg‘iziston reytingda birinchi o‘rinni egallab, yakkaxon sarguzashtlar uchun eng maqbul manzil deb topildi.

O‘zbekiston ham ushbu nufuzli ro‘yxatga kiritildi, biroq u qo‘shni Qirg‘izistondan 4 pog‘ona pastda, ya’ni 5-o‘rinda qayd etildi.

Solo Travel Index 2026 boyicha top-10 davlatlar ro‘yxati:

1. Qirg‘iziston
2. Italiya
3. Yaponiya
4. Portugaliya
5. O‘zbekiston
6. Reyunon oroli
7. Ispaniya
8. Norvegiya
9. Tanzaniya
10. Nepal

Tahlilchilarning ta’kidlashicha, kichik guruhlar tarkibida yakkaxon sayohat qilish harakat erkinligini saqlagan holda xavfsiz va samimiy hamrohlikni ta’minlaydi.