Хонзода, актёр, тиктокер, гастарбайтер, машҳур сулола аъзоси — хорижда яшовчи ўзбекистонлик шоу-бизнес вакиллари

Охирги пайтларда Ўзбекистондан “суриш” санъаткорлар орасида оммалашиб қолган. Бу орқали ўз ижодини тўхтатган шоу-бизнес вакиллари

талайгина. Лекин, айнан ижодини юксалтириш мақсадида четга кетганлар ҳам бор. Улар ўз меҳнати эвазига дунё юлдузи даражасига эриша олган.

Юлдузлар тақвими

Ўзбекистонликлар орасида энг кўп четга чиқиш Россия Федерациясига бўлади. Санъаткорларда ҳам бу анъана сақланиб қолган. Машҳурликка эришган ўзбекистонликларнинг ҳам асосий қисмини Россия эстрадасида кўришимиз мумкин.

“НАРГИЗ” — Наргиза Зокирова

Зокировлар оиласи аъзоси, ҳозирда 54 ёшли Наргиза Зокирова ҳам шулар қаторидандир. Ижодини 15 ёшида бошлаган қизалоқ кейинчалик фаолиятини АҚШда давом эттиради. 2012 йилга келиб у Россиянинг “Голос” кўрсатувида иштирок этиб, мавсумда иккинчи ўринни эгаллаган. Шу орқали россиялик таниқли продюсер Максим Фадеев 2014 йилдан бошлаб Наргиза Зокирова билан ишлай бошлайди. Уларнинг биргаликдаги фаолияти 2019 йилда ўз якунига етган. У Россия эстрадасида “Наргиз” тахаллуси билан ижод қилади. Наргизнинг юлдузли даври ҳам айнан Максим Фадеев билан ўтган.

Унинг энг машҳур қўшиқларидан бири бу Максим Фадеев билан куйлаган “Вдоём” қўшиғи. У YouTube платформасида 342 миллиондан ортиқ томоша қилинган. Наргизни Instagram тармоғида 391 мингта одам доимий равишда кузатиб боради.

“Black Star” — Doni

Россиянинг “Black Star” гуруҳи орқали бизга яхши таниш бўлган Doni ҳам асли ўзбекистонлик ҳисобланади. Асл исми Достонбек Исломов бўлган репер Тошкентда туғилган бўлса ҳам, болалиги Фарғонада ўтган. Россияга ишлаш мақсадида борган Doni мусиқага қизиқиши сабаб “Black star” гуруҳининг кастингида қатнашиб, жамоага қабул қилинади. У 2020 йилгача мазкур гуруҳ билан ижод қилиб келган. Ҳозирда эса яккахон тартибда фаолият юритади.

Doni’ни танитган ва энг машҳур қўшиғи бу Натали билан айтган “Ты такой” таронаси. Мазкур тарона YouTube’да қарийб 322 миллион марта томоша қилинган. Doni’нинг Instagram’даги обуначилари 1 миллионга тенг.

Хон авлодидан чиққан банк амбассадори

Албатта, юқорида санаб ўтганларимиз чет тилида ижод қилишади. Лекин, асосан ўзбек тилида куйлаб, дунёга танилган машҳурлардан бири бу — Севара Назархон. 48 ёшли Севара Назархон турли хил давлатларда яшаб, ижод қилмоқда. У фаолияти давомида чет эллик таниқли продюсер, бастакорлари билан бирга ишлаган. Севара Назархон 10 дан ортиқ альбомлар муаллифи ва кўплаб мукофотлар совриндори ҳисобланади. Унинг олган энг яхши мукофотларидан бири “BBC Music World Award”нинг “Best Asian artist” мукофотидир. У ушбу мукофотни 2004 йилда қўлга киритган.

Ўзининг “Улуғимсан ватаним” таронаси билан барчага таниш бўлган Севаранинг энг машҳур таронаси бу унинг ижросидаги YouTube платформасида 46 минг марта тингланган “Там нет меня”дир. Айни вақтда Севара Назархонни Instagram’да 1,2 миллион обуначи кузатиб боради. Шунингдек, хонанда “Ипак Йўли Банк”нинг амбассадори ҳисобланади.

Қизиқарли маълумотлар: Севара Назархон Қўқон хони Худоёрхоннинг авлоди ҳисобланади. Шунингдек, хонанда Пелагея Севара билан ўзбек тилида дуэт куйлаган. 2004 йилгача Севарани Тошкент бўйлаб ролик учаётганини кўриш мумкин эди.

Актёрликдан рус эстрадасига

Рашид образи билан танилган Абдулғофур Исахоновни биз бугунги кунда Gafur тахаллуси орқали яхши таниймиз. 1998 йилда туғилган Gafur карьерасини ўзбек кино санъатида бошлаган. У актёрликда “Новда”,”Элпарвар” фильмларида ўйнаган роли билан шуҳрат қозонган. Gafur мусиқага қизиқиши сабаб Россиянинг бир қанча дастурларида қатнашган. 2019 йилга келиб эса у Россиянинг таниқли “Raava music” гуруҳи билан ишлай бошлаган. У ушбу гуруҳда рус эстрадаси юлдузлари Elman, Andro, Jony’лар билан ижод қилиб келмоқда.

Унинг “Lollipop” таронаси YouTube’да 90 миллион марта тингланган. Ушбу тарона Jony билаан биргаликда куйланган бўлиб, ижтимоий тармоқларда челленж рақси билан оммалашган. Gafur’нинг Instagram профилида 666 мингта обуначиси бор. 

“Tashkent to Dubai and LA”

Блогер, тиктокер, репер Рахим Абрамов ҳам Тошкент шаҳрида туғилган бўлиб, ўз карьерасини блогерликдан бошлаган. Rakhim тахаллуси билан танилган репер Россияга ўқиш мақсадида бориб, у ерда Instagram ҳамда Tik Tok учун қисқа видеолар олишни бошлайди. У мусиқа соҳасидаги фаолиятини 2019 йилда бошлаган. Машҳурликка эриштирган қўшиғи эса “Fendi” таронаси ҳисобланади. Репернинг ҳар бир қўшиғи бугунги кунда Tik Tok’да челленжга айланади. Репер 2023 йилнинг ёзида Ўзбекистонга келиб, Андижонда бўлган “Дунё садолари” мусиқий фестивалида чиқиш қилди. Ундан кейин эса Тошкент шаҳрида ўзининг “Talk to me nice” таронасига клип суратга олди.

Унинг “Fendi”си YouTube’да 59 миллиондан ортиқ томошага эга. Rakhim’нинг Instagram саҳифасидаги обуначилар сони эса 6,1 миллионта.