Surunkali kasallikka chalingan shaxslarning subsidiya olishidagi muammolar yuzasidan senatorlar adolat talab qilmoqda

Uy-joy — har bir inson uchun eng asosiy ehtiyojlardan biri. Ammo ayrim fuqarolar, xususan, og‘ir surunkali kasallikka chalingan shaxslar, uy-joy ipotekasi bo‘yicha subsidiyalar olish jarayonida ko‘plab qiyinchiliklarga duch kelmoqda. Minglab oilalarning umidi bo‘lgan bu tizimda hali ham shaffoflik va samaradorlikni ta’minlash zarurati mavjud. Nafaqat qonunlar, balki amaliy choralarning o‘z vaqtida ko‘rilishi ushbu muammolarni hal qilishda muhim rol o‘ynaydi. Shu sababli, Senatning Sud-huquq masalalari va korrupsiyaga qarshi kurashish qo‘mitasi Sog‘liqni saqlash vazirligiga senator so‘rovi yuborib, bu borada zarur choralar ko‘rilishini talab qildi.

Surunkali kasallikka chalingan shaxslarning muammolari

2023-yilda tijorat banklariga 31 ming oilaga uy-joy ipotekasi uchun 9 trillion so‘mlik resurs yo‘naltirilib, dastlabki badal uchun va foizlarni qoplashga 1,6 trillion so‘m subsidiya ajratilgan.

Surunkali kasallikning og‘ir turlaridan azob chekayotgan va alohida xonada yashashga muhtoj bo‘lgan shaxslarning subsidiya olishi bilan bog‘liq jarayonlarda Sog‘liqni saqlash vazirligiga ham qator vazifalar yuklatilgan.

“Yuksalish” umummilliy harakati, Korrupsiyaga qarshi kurashish agentligi, “Mintaqaviy muloqot” xalqaro nodavlat tashkiloti, shuningdek, boshqa tashkilotlar hamda ekspertlar hamkorligida “Ipoteka krediti bo‘yicha davlat subsidiyalarini berishdagi insofsizlik xavflarini baholash” bo‘yicha o‘tkazilgan tadqiqot natijasida amalga oshirilgan ishlar bilan bir qatorda sohada hali o‘z yechimini kutayotgan masalalar mavjudligi ma’lum bo‘ldi.

Vazirlar Mahkamasining qarori ijrosi ta’minlanmagan

Senatning Sud-huquq masalalari va korrupsiyaga qarshi kurashish qo‘mitasi raisi Abdulhakim Eshmurodovning ma’lum qilishicha, 2020-yil 25-martdagi 182-sonli qarorda surunkali kasallikning og‘ir turlaridan aziyat chekayotgan va alohida xonada yashashga muhtoj shaxslar ro‘yxatini ishlab chiqish va tasdiqlash belgilangan. Ammo ushbu ro‘yxatni ishlab chiqish va tasdiqlash ishlari hanuz yakuniga yetkazilmagan. Shuningdek, hududiy tibbiyot muassasalarida bemorlarning surunkali kasalliklari haqidagi ma’lumotlarni elektron tarzda kuzatib borish va yangilash imkoniyati yetarli darajada yo‘lga qo‘yilmagan. Bu holat fuqarolarni qo‘shimcha qiyinchiliklarga duchor qilmoqda.

Fuqarolar e’tirozlari va murojaatlar ko‘paymoqda

Bemorlarning kasallik tarixini raqamlashtirishga yetarlicha e’tibor qaratilmasligi fuqarolarning subsidiya olish bilan bog‘liq muammolariga olib kelmoqda. Ushbu muammolar davlat organlari va tashkilotlarga murojaatlarning ortishiga sabab bo‘ldi.

Senatga 2024-yilning 10 oyi davomida uy-joy masalasi bo‘yicha 1 137 ta murojaat kelib tushgan. Bu, ayniqsa, og‘ir surunkali kasallikka chalingan shaxslarning huquqlari va ehtiyojlari bo‘yicha muammolarning hal qilinishi zarurligini ko‘rsatmoqda.

So‘rov yuborildi

Muammolarni bartaraf etish maqsadida Senatning Sud-huquq masalalari va korrupsiyaga qarshi kurashish qo‘mitasi tomonidan Sog‘liqni saqlash vazirligiga so‘rov yuborilgan. Senatorlar vazirlikni belgilangan vazifalarni bajarishni, 17-dekabrga qadar asoslantirilgan tushuntirishlar va rejalarni taqdim etishni talab qilmoqda.