Салимбойдан Қирғизистон Республикаси президентини ўлдириш учун ёрдам сўралган бўлиши мумкин

Бу ҳақда Қирғизистон Республикаси Президенти Садир Жапаров ўзи “Кабар” ахборот агентлигига берган интервьюсида гапирган.

Маълум бўлишича, Ўзбекистон Миллий олимпия қўмитаси раиси ўринбосари, мамлакат спорт курашлари ассоциацияси раиси Салим Абдувалиев билан учрашиш учун ўзбек-қирғиз чегарасини ноқонуний кесиб ўтган депутат Эмил Жамғирчиев яна бир жиноят устида гумонланмоқда.

“Икки дўст” фитнаси

Мамлакат президенти Садир Жапаровнинг сўзларига кўра, бундан аввал қочиб кетган парламент депутати Эмил Жамғирчиев ўзбекистонлик Салим Абдувалиевдан “икки дўст”ни йўқ қилишга ёрдам сўраган. Маълум бўлишича, Қирғизистон матбуотига кўра, мамлакатда президент ва МХДҚ раҳбари шундай ном билан чақирилади.

Интервьюдан парча

Президент журналистнинг саволларига жавоб берар экан, “Менга тақдим этилган маълумотларга кўра, (Жамгирчиев) Қирғизистон-Ўзбекистон давлат чегарасини ноқонуний кесиб ўтиб, „Салимбой“ лақабли криминал авторитет Салим Абдувалиев билан учрашиб, „икки дўстни“ йўқ қилишга ёрдам беришни сўраган”, — дея вазиятни очиқлаган. Шунингдек, Жапаров депутат иши бўйича терговни Миллий хавфсизлик давлат қўмитаси ходимлари ҳамда Ўзбекистон махсус хизматлари биргаликда олиб боришганини билдириб, натижа қандай бўлиши ўзи учун қизиқ эмаслигини айтиб ўтган.

Салим Абдувалиев ҳам ”ухлатилган”ми?

Аввалроқ Қирғизистон миллий хавфсизлик қўмитаси раҳбари Қамчибек Ташиев депутат бутун Қирғизистонни шарманда қилганини маълум қилган эди. Ўшанда депутат Эмил Жамғирчиев Салимбойнинг олдига боргани ва Қамчибек Ташиев ўзидан 180 минг доллар пулни мажбуран ундириб олганидан шикоят қилиб, Салимбойдан Қирғизистон миллий хавфсизлик қўмитаси раҳбарига нисбатан чора кўришни сўраган. Шундан сўнг, Ташиев Жамғирчиев Салимбойнинг ёрдамчисини ҳам алдаб кетгани, Тошкентдаги меҳмонхоналарда яшаб, пулини тўламай қочиб кетганини ҳам маълум қилганди.