Мирзиёев Ҳиндистон бош вазирини 70 ёши билан табриклади

Ўзбекистон Республикаси Президенти Шавкат Мирзиёев Ҳиндистон Республикаси Бош вазири Нарендра Модига унинг 70 ёшлик таваллуд аёми муносабати билан самимий қутловларини йўллади. Бу ҳақида Президент Матбуот хизмати ҳабар берди.

Давлат раҳбари ўз мактубида Ҳиндистон Бош вазирига сиҳат-саломатлик, бахт-саодат ва масъулиятли давлат лавозимидаги фаолиятида янги муваффақиятлар, дўст Ҳиндистон халқига эса тинчлик-омонлик ва бардавом тараққиёт тилаган.

Эслатиб ўтамиз, бундан аввал Шавкат Мирзиёев Япония Либерал-демократик партияси етакчиси Ёсихидэ Сугага унинг мамлакат Бош вазири этиб сайлангани муносабати билан табрик йўллаганди.