Toshkentda ichkilik sabab boshlangan janjal 19 yoshli yigitning o‘limi bilan yakunlandi

Toshkent viloyati, Keles shahrida 19 yoshli yigit bolalar maydonchasida spirtli ichimlik iste’mol qilayotgan o‘smirlarga ogohlantirish bergani uchun pichoqlab o‘ldirildi. Dastlabki tergov ma’lumotlariga ko‘ra, hujum 17 yoshli o‘smir va uning do‘stlari tomonidan sodir etilgan. Bu haqda “Millar” ko‘rsatuvida xabar berildi.

Jinoyat tafsilotlari

13-fevral kuni Keles shahridagi bolalar maydonchasida 19 yoshli yigit o‘smirlar tomonidan kaltaklanib, 8 marta pichoq bilan jarohatlangan. Guvohlarning so‘zlariga ko‘ra, zo‘ravonlar yigitni avval do‘pposlab, keyin qorin sohasiga pichoq sanchgan va orqasiga yetti marotaba zarba bergan.

Tibbiyot xodimlari jabrlanuvchini darhol shifoxonaga olib borgan, biroq jarohatlar og‘irligi sabab u hushiga kelmay vafot etgan. Shifokorlarning ma’lum qilishicha, bemorning ichki a’zolari shikastlangan, uni qutqarishning imkoni bo‘lmagan.

Qotillik sababi

Tergov ma’lumotlariga ko‘ra, marhum bolalar maydonchasida ichkilik ichayotgan bir guruh o‘smirlarga ogohlantirish bergan. Bu joyda uning singlisi ham o‘ynashi sabab u ularni tartibga chaqirgan. Biroq o‘smirlar tajovuzkor munosabat bildirgan va kelishmovchilik janjalga aylanib ketgan.

Vafot etgan yigitning onasi ta’kidlashicha, janjalda qatnashganlar ko‘pchilik bo‘lgani, ular o‘g‘liga jami 8 marta pichoq bilan zarba berganini ma’lum qilgan.

Huquqiy chora

Bosh prokuratura ma’lumotiga ko‘ra, jinoyatni sodir etishda gumon qilinayotgan 17 yoshli o‘smir hibsga olingan. Unga nisbatan O‘zbekiston Jinoyat kodeksining 97-moddasi 1-qismi (“Qasddan odam o‘ldirish”) bo‘yicha jinoyat ishi qo‘zg‘atilgan. Tergov ishlari davom etmoqda.