Rasmiylar poytaxtdagi vaziyat haqida: Shaharda hech qanday “kollaps” yuz bermadi

Toshkent shahar hokimiyati matbuot xizmati bugun ijtimoiy tarmoqlarda tarqalgan “shaharda kollaps yuz berdi” mazmunidagi xabarlarni asossiz deb topdi. Rasmiy ma’lumotlarga ko‘ra, kuchli qor yog‘ishi va ob-havoning keskin sovib ketishiga qaramay, poytaxtdagi barcha kommunal xizmatlar kuchaytirilgan tartibda faoliyat yuritmoqda. Hokimiyatning ta’kidlashicha, shaharda ommaviy elektr va gaz ta’minoti uzilishlari kuzatilmagan, yo‘llar muntazam tozalanmoqda va transport harakati davom etmoqda. Aholiga esa ehtiyot bo‘lish, ayniqsa, daraxtlar yaqinida hushyorlik bilan harakatlanish tavsiya etilgan.

Daraxtlarning qulashiga nima sabab bo‘ldi?

Bugun yoqqan qordan so‘ng shahar bo‘ylab daraxtlarning qulab tushishi ko‘plab muhokamalarga sabab bo‘ldi. Hokimiyat bu holatni faqatgina qor yog‘ishi bilan emas, balki bir nechta ob-havo omillarining birlashuvi bilan izohladi. Kuchli yomg‘ir natijasida daraxtlarning tanasi va shoxlari suvni shimib, zaiflashgan. Shundan so‘ng haroratning keskin pasayishi shoxlarning mo‘rtlashishiga olib kelgan. Muz va qalin qor og‘irlikni oshirib, natijada ko‘plab daraxtlarning shikastlanishiga sabab bo‘lgan. Toshkent shahar ekologiya boshqarmasi barcha daraxtlarning Ekologiya vazirligi reyestrida qayd etilganini va ular doimiy nazorat ostida ekanini ma’lum qildi.

“Palma daraxtlari” va shahar infratuzilmasi haqida

Ijtimoiy tarmoqlarda Toshkentdagi daraxtlarning noto‘g‘ri kesilishi borasida ham bahs-munozaralar avj oldi. Ularning ayrimlari “palma daraxtlariga” o‘xshab qolgani ta’kidlanmoqda. Biroq hokimiyat bu iddaolarni rad etdi va shahar hududida qulab tushgan daraxtlarning hech biri bu tavsifga mos kelmasligini bildirdi. Mutasaddilar daraxtlarni kesish qoidalar asosida amalga oshirilishini va bu jarayon ularning umrini uzaytirishga xizmat qilishini qayd etdi.

Shahar hayoti barqaror davom etmoqda

Toshkent hokimiyati shahar infratuzilmasi uzluksiz ishlayotganini va transport harakati davom etayotganini ta’kidladi. Kommunal xizmatlar noqulayliklarni bartaraf etishda uzluksiz faoliyat olib borayotgan bo‘lsa-da, aholiga hushyorlikni saqlash tavsiya etilmoqda. Rasmiylar, shuningdek, shahar hayoti izdan chiqdi degan ma’nodagi shov-shuvli xabarlarga ishonmaslikni, faqat ishonchli manbalarga tayanishni so‘radi. Hokimiyat yolg‘on ma’lumot tarqatish javobgarlikka sabab bo‘lishi mumkinligini eslatib, vahima tarqatishdan voz kechishga chaqirdi.