Ўқитувчиларга Жанубий Кореяда малака ошириш имкони берилади

Мактаб ва мактабгача таълим вазирлиги ахборот хизмати маълум қилишича, мактабларда корейс тилидан дарс бераётган ўқитувчилар Жанубий Кореяда тажриба ошириши мумкин.

Ушбу имконият «Ўқитувчилар алмашинуви Корея-Ўзбекистон 2024» лойиҳаси доирасида амалга оширилади.

5 нафар ўқитувчи танлаб олинади

Мазкур лойиҳа асосида танлов бўйича 5 нафар ўқитувчи танлаб олинади. Улар Кореяда 2024 йилнинг 1 мартидан 2025 йилнинг 28 февралига қадар фаолият юритишади.

Шартлар

Ушбу танловда қатнашиш учкн номзодларга бир неча талаблар қўйилади. Ўқитувчи:

▪️Ўзбекистон фуқароси бўлиши;

▪️корейс тилидан (TOPIK) сертификатга,Таълим маркази ёки Кинг Сежонг институтида корейс тили курсларини тамомлаганлик сертификатлари ва бошқа сертификатларга эга бўлиши,

▪️Корея визасини олишда чекловлари бўлмаган бўлиши керак.

Мажбурият ҳам мавжуд

Ушбу имконият тақдим этилар экан, педагогларга бир неча мажбуриятлар ҳам юклатилади.

Масалан, улар олдинги иш жойларига қайтгандан кейин камида 4 йил ишлаб бериш мажбурияти юкланади.

Харажатларни ким қоплайди?

Хорижга бориб-келиш, турар жой, яшаш харажатларичи, деган савол туғилиши табиий.

Ғолибларга икки томонлама авиачипталар, ҳар ойлик маош, турар жой ва тиббий хизмат тўловлари тўлаб берилади.