Nursiz kun: Paralimpiya o‘yinlarining 5-kuni O‘zbekiston delegatsiyasi uchun medallarsiz yakunlandi

1-sentyabr kuni Paralimpiya musobaqalarining 5-kuni o‘tkazilib, unda O‘zbekiston delegatsiyasining 3 nafar a’zosi ishtirok etdi. Bular: para akademik eshkak eshish PR1 bahslarida — Muxayyo Abdusattorova, para yengil atletika T12 (uzunlikka sakrash) bahslarida — Yoqutxon Xolbekova hamda para yengil atletika T13 (100 m. yugurish) bahslarida — Doniyor Axmedov. O‘tgan kundan farqli, ushbu kunda sportchilarimizga shohsupaga ko‘tarilish baxti nasib qilmadi. Shunda bo‘lsa-da, biz an’anamizga muvofiq ravishda sportchilarimizning qayd etgan natijalari bilan sizni tanishtirib boramiz. 

Muxayyo Abdusattorova “B” finalda ishtirok etdi

Para akademik eshkak eshuvchimiz Muxayyo Abdusattorova bundan biroz avval “B” finalda startga chiqdi. Vakilimiz ushbu dasturda 12 daqiqa 25.03 soniya natija ko‘rsatib, marraga 5-bo‘lib yetib keldi. Shu tariqa Muxayyo Abdusattorova Parij-2024 yozgi Paralimpiya o‘yinlarini 11-o‘rinda yakunladi.

Yoqutxon Xolbekova final dasturida ishtirok etdi

Para yengil atletika bo‘yicha ayollar o‘rtasida T12 klassida uzunlikka sakrash dasturida ishtirok etgan hamyurtimiz Yoqutxon Xolbekova 3.43 metr natija qayd etdi va musobaqani 9-o‘rinda yakunladi. Qayd etish lozimki, amaldagi jahon chempioni hisoblangan hamyurtimiz Yoqutxon Xolbekova musobaqadan oldingi mashg‘ulot jarayonida olgan jarohati tufayli yuqori natija qayd eta olmadi.

Doniyor Axmedov mavsumdagi eng yaxshi natijasini qayd etdi

Bundan biroz avval para yengil atletikaning erkaklar o‘rtasida T13 klassida 100 metrga yuugurish bo‘yicha saralash bahslari yakunlandi. Ushba dasturda startga chiqqan vakilimiz Doniyor Axmedov 11.42 soniya natija bilan o‘zining joriy mavsumdagi eng yaxshi natijasini qayd etdi. Biroq ushbu natija hamyurtimizning keyingi bosqichga chiqishiga yetarli bo‘lmadi.

Bugungi kun dasturi

Bugun Parij-2024 yozgi Paralimpiya o‘yinlarida O‘zbekiston delegatsiyasining 12 nafar a’zosi ishtirok etadi:

13:00. Doniyor Saliyev

para yengil atletika T12 | erkaklar | uzunlikka sakrash

13:15. Nataliya Semyonova

para yengil atletika F56 | ayollar | nayza uloqtirish

13:48. Yoqutxon Xolbekova

para yengil atletika T12 | ayollar | 400 m. yugurish

13:49. Kirill Pankov

para suzish S13 | erkaklar | 50 m. erkin

13:49. Muzaffar Tursunxo‘jayev

para suzish S13 | erkaklar | 50 m. erkin

13:49. Kirill Pankov

para suzish S13 | erkaklar | 50 m. erkin

13:55. Shoxsanam Toshpo‘latova

para suzish S13 | ayollar | 50 m. erkin

13:55. Muslima Odilova

para suzish S13 | ayollar | 50 m. erkin

14:02. Nurxon Qurbonova

para yengil atletika F54 | ayollar | yadro uloqtirish

15:12. Asila Mirzayorova

para yengil atletika T11 | ayollar | 100 m. yugurish

15:15. Boburjon Omonov

para yengil atletika F41 | erkaklar | yadro uloqtirish

22:15. Izzat Turg‘unov

para yengil atletika T36 | erkaklar | uzunlikka sakrash