Ronaldu Toshkentga, Benzema Farg‘onaga keladi

Oliy darajadagi Osiyo futbolida navbatdagi mavsumga qura tashlandi. Malayziya poytaxti Kuala-Lumpur shahrida o‘tkazilgan tadbir mamlakatimiz futbol muxlislari uchun bir qator muhim va qiziqarli xabarlarni taqdim etdi.

Turnirning yangi formati va qura tartibi

Osiyo Futbol Konfederatsiyasi ushbu mavsumdan e’tiboran Elit Chempionlar Ligasi formatiga jiddiy o‘zgartirish kiritdi. Endilikda musobaqa ishtirokchilari soni 24 tadan 32 taga ko‘paytirilib, odatiy guruh bosqichidan voz kechildi va yagona liga tizimiga o‘tildi. Yangi tartibga ko‘ra, har bir jamoa umumiy hisobda 8 ta har xil raqibga qarshi 8 ta uchrashuvda (4 tasi o‘z maydonida va 4 tasi safarda) maydonga tushadi.

Qura jarayonida amal qilgan OFK reytingi hamda mamlakatlar cheklovi sababli O‘zbekiston vakillarining raqiblari doirasi oldindan ma’lum chegaraga ega edi. Bizning jamoalarimiz faqat Saudiya Arabistoni, Eron va Iroq klublari bilan to‘qnash kelishi belgilangan edi. Shu bois, “Paxtakor” va “Neftchi” o‘tkazadigan 8 ta o‘yindan 5 tasida raqiblik vazifasi Saudiya Arabistonining yetakchi klublariga topshirildi.

Krishtianu Ronalduning Toshkentga tashrifi

Muxlislarni eng ko‘p qiziqtirgan masalalardan biri — jahon futboli yulduzi Krishtianu Ronalduning O‘zbekistonga kelish-kelmasligi edi. Qura natijalariga ko‘ra, Saudiya Arabistonining “Al-Nasr” jamoasi Toshkentning “Paxtakor” klubiga aynan safar raqibi sifatida to‘g‘ri keldi. Bu esa portugaliyalik hujumchining “Paxtakor"ga qarshi kechadigan bahsda poytaxtimizga tashrif buyurish ehtimolini keskin oshiradi.

Toshkentliklar o‘z maydonida Eronning “Istiqlol” va “Traktor” hamda Saudiya Arabistonining “Al-Nasr” va “Al-Qodisiya” klublarini qabul qiladi. Safar uchrashuvlarida esa poytaxt jamoasi “Al-Ahli” (Saudiya Arabistoni), “Eyr Fors” (Iroq), “Al-Hilol” (Saudiya Arabistoni) hamda “Al-Ittihod” (Saudiya Arabistoni) mehmoni bo‘ladi.

“Neftchi”

Farg‘onaning “Neftchi” jamoasi uchun ham qur’a jiddiy sinovlarni taqdim etdi. Murabbiy Islom Ismoilov boshchiligidagi jamoa o‘z maydonida Saudiya Arabistonining eng kuchli vakillari — “Al-Hilol”, “Al-Ahli” va “Al-Ittihod” hamda Iroqning “Eyr Fors” jamoalari bilan bahslashadi. Aynan shu sababli farg‘onalik muxlislar o‘z shaharlarida haqiqiy futbol bayramiga guvoh bo‘lishadi.

Ronaldu masalasiga kelganda, “Neftchi” uchun uchrashuv joyi biroz boshqacha ko‘rinish oldi. Farg‘onaliklar “Al-Nasr”ga qarshi o‘yinni Saudiya Arabistonida o‘tkazishadi. Bundan tashqari, jamoa safarda Eronning “Istiqlol” va “Traktor” hamda Saudiya Arabistonining “Al-Qodisiya” klublari mehmoni bo‘ladi.

“Nasaf”ning OFK Chempionlar Ligasi 2 dagi ishtiroki

Qarshining “Nasaf” jamoasi esa qit’aning ikkinchi darajali xalqaro turniri — OFK Chempionlar Ligasi 2 musobaqasida o‘z yurishini boshlaydi. Ro‘ziqul Berdiyev shogirdlari “A” guruhidan joy olishdi. Ushbu bosqichda Qarshi klubiga BAAning “Al-Vahda”, Kuvaytning “Kuvayt SK” va Bahraynning “Al-Xaldiya” jamoalari raqiblik qiladi.

Musobaqa taqvimi

Elit Chempionlar Ligasining liga bosqichi o‘yinlari 2026-yilning 14-15-sentyabr kunlari start oladi va 2027-yilning 17-fevraliga qadar davom etadi. Nizomga muvofiq, har bir mintaqada eng yuqori ko‘rsatkich qayd etgan dastlabki 8 ta jamoa nimchorak final bosqichiga yo‘llanma oladi.

Kutilayotgan mavsum O‘zbekiston klublari uchun har tomonlama jiddiy sinov va ulkan mas’uliyat demakdir. Bir tarafdan, Saudiya Arabistoni grandlarining mamlakatimizga tashrifi ishqibozlar uchun katta bayram bo‘lsa, ikkinchi tarafdan, bunday saviyadagi raqiblar qarshisida pley-off yo‘llanmasini qo‘lga kiritish vakillarimizdan maksimal tayyorgarlik va matonat talab etadi.