“Qora dayjest”: 2024-yil 22-fevral voqealari

1,3 million dollarga pullangan yer

1977-yilda Namangan viloyatida tugʻilgan, “Sunnat Spets Story” MCHJ taʼsischisi, 1978-yilda Toshkent shahrida tugʻilgan shaxsga Toshkent viloyati, Oʻrtachirchiq tumanidagi ushbu MCHJga ajratilgan 6,7 gektar yer maydonini jami 1 mln. 340 ming AQSH dollariga va u yerga tutash boʻlgan tuman hokimligi zaxirasidagi 2 gektar yer maydonini 10 000 AQSH dollari evaziga 10 yil muddatga foydalanish uchun Kadastr boʻlimida ishlovchi tanishlari orqali hujjatlarini rasmiylashtirib berishni vaʼda qilgan.

O’tkazilgan tezkor tadbir davomida gumonlanuvchi Yashnobod tumani Botkina koʻchasidagi kafeda oldindan 50 000 AQSH dollari miqdordagi pullarni olgan vaqtida ashyoviy dalil bilan ushlandi.

24 ta xonadon uchun 37 nafar fuqarodan pul undirgan rahbar aniqlandi

Bosh prokuratura huzuridagi Departamentning Zafarobod tuman bo‘limi tomonidan fuqarolarning huquq va manfaatlarini himoya qilish yuzasidan o‘tkazilgan tergovga qadar tekshiruvda “I.C.” MCHJ tomonidan “Bo‘ston” MFY hududida 4 qavatli 24 ta xonadondan iborat turar-joy majmuasi qurilgan bo‘lsada, MCHJ rahbari J.K. yana qo‘shimcha ravishda 13 ta xonadon uchun fuqarolarning jami 303,9 mln so‘mini firibgarlik yo‘li bilan qo‘lga kiritganligi aniqlangan.

Qidiruvdagi shaxs Turkiyada qo‘lga olindi

Turkiya va O‘zbekiston Respublikasi Ichki ishlar vazirliklari hamkorligida o‘tkazilgan tezkor tadbir davomida qo‘lga olingan, firibgarlik jinoyatini sodir etganlikda ayblanib, O‘zbekiston Respublikasi Ichki ishlar vazirligi tomonidan qidiruvda bo‘lgan, 1976 yilda tug‘ilgan Musayev Saidumarxon Saidamirxonovich joriy yilning 20-fevral kuni O‘zbekiston Respublikasining Istanbul shahridagi Bosh konsulxonasi xodimlari ishtirokida Istanbul xalqaro aeropotidan O‘zbekistonga deportatsiya qilindi.

Tabiiy gazdan noqonuniy foydalanish holatlari fosh etildi

 Qibrayda o‘tkazilgan tezkor tadbirda “F.F.” MCHJ rahbari Z.Gʻ. va boshqalar MCHJning qum quritish syexida gaz tarmog‘idan tamg‘alash yo‘li bilan uzilgan bo‘lsada, o‘zboshimchalik bilan tijorat maqsadida tarmoqqa qayta ulanib, yuqori quvvatdagi sertifikatlanmagan gaz yondirgichdan foydalangan holda 553,4 mln so‘mlik tabiiy gazdan noqonuniy foydalanganliklari aniqlangan.

Shu kabi, Quyichirchiqda “Sirg‘ali” MFYda yashovchi A.O. o‘z uyining 24 sotix yer maydonida issiqxona tashkil etib, ushbu issiqxonani hech qanday hujjatsiz tijorat maqsadida umumiy foydalanishdagi gaz tarmog‘iga o‘g‘rilik yo‘li bilan ulab, jami 149,8 mln so‘mlik tabiiy gazdan noqonuniy foydalanganligi aniqlangan.

6 ta viloyatda qor ko‘chish xavfi

“O‘zgidromet” agentligi 23–29 fevral kunlari O‘zbekistonning 6 ta viloyatida qor ko‘chishi xavfini e’lon qildi.

Kutilayotgan yog‘ingarchilik hamda havo haroratining o‘zgarishi sababli ko‘chki respublikaning tog‘li, jumladan, quyidagi hududlarida kuzatiladi:

-       Qashqadaryo viloyati: Dehqonobod, Kitob, Qamashi, Shahrisabz tumanlari;

-       Surxondaryo viloyati: Boysun, Qumqo‘rg‘on, Sariosiyo, Uzun tumanlari;

-       Samarqand viloyati: Nurobod, Qo‘shrabot, Samarqand, Urgut tumanlari;

-       Jizzax viloyati: Baxmal, Zomin tumanlari;

-       Toshkent viloyati: Bo‘stonliq, Parkent, Ohangaron tumanlari (Chotqol tizmasi tog‘lari);

-       Namangan viloyati: Pop tumani.

Tog‘li hududlarda istiqomat qiluvchi fuqarolar, dam oluvchilar hamda tog‘li hududlarda harakatlanuvchi haydovchilardan ehtiyotkorlik choralarini ko‘rishlari so‘raldi.