Rossiya mamlakatning eng yirik neft va gaz ishlab chiqaruvchi kompaniyalarini birlashtirmoqchi
Birlashgan kompaniya sanksiyalarga yaxshiroq qarshi tura olish hamda urushni qo‘llab-quvvatlash uchun energetika sektorini safarbar qilishga yordam beradi.
3 daqiqa o‘qiladi
The Wall Street Journal ma’lumotlariga ko‘ra, so‘nggi bir necha oy davomida "Rosneft”, “Gazprom neft” va “Lukoyl” kompaniyalarining rahbarlari va hukumat amaldorlari o‘rtasida kelishuv bo‘yicha muzokaralar olib borilgan. Rossiyaning “Rosneft”, “Gazprom neft” va “Lukoyl” kompaniyalari mamlakatning eng yirik neft va gaz ishlab chiqaruvchilari hisoblanadi. Nashr manbalarining ta’kidlashicha, reja tafsilotlari o‘zgarishi mumkin, hatto birlashish umuman amalga oshmasligi ham mumkin.
Birlashuv sababi va oqibatlari
Ushbu birlashuv ro‘y bersa, vujudga keladigan kompaniya jahonda Saudiya Arabistonining Aramco kompaniyasidan keyin ikkinchi yirik neft ishlab chiqaruvchisiga aylanadi, shuningdek, neft qazib olish hajmi Exxon Mobil’nikidan uch baravar yuqori bo‘lishi kutilmoqda. Nashr suhbatdoshlariga ko‘ra, birlashgan kompaniya G‘arb sanksiyalariga yaxshiroq qarshi tura oladi va neftni Hindiston hamda Xitoyga yuqoriroq narxlarda sotadi. Shuningdek, uning yordamida Putin urushni qo‘llab-quvvatlash uchun energetika sektorini safarbar qilishi va iqtisodiyot ustidan nazoratni kuchaytirishi mumkin.
“Rosneft”
“Rosneft” — Rossiyaning eng yirik davlatga qarashli neft va gaz kompaniyasi bo‘lib, 1993-yilda tashkil etilgan. Kompaniya neft va gaz qazib olish, qayta ishlash va sotish bilan shug‘ullanadi. “Rosneft” Rossiyadagi eng yirik neft qazib oluvchi kompaniya bo‘lib, dunyoda ham yetakchi o‘rinlarda turadi. “Rosneft” kompaniyasining O‘zbekistondagi faoliyati haqida ochiq ma’lumotlar mavjud emas. Kompaniya asosan Rossiya va boshqa mamlakatlarda faoliyat yuritadi.
“Gazprom neft”
“Gazprom neft” — “Gazprom” kompaniyasining neft va gaz bo‘yicha sho‘ba korxonasi. U 1995-yilda “Sibneft” nomi bilan tashkil etilgan bo‘lib, 2006-yilda hozirgi nomini olgan. Kompaniya neft va gaz qazib olish, qayta ishlash va neft mahsulotlarini sotish bilan shug‘ullanadi. “Gazprom neft” Rossiyadagi eng yirik neft qazib oluvchi va qayta ishlovchi kompaniyalardan biri hisoblanadi. “Gazprom” 2004-yilda “Shaxpaxti" koni bo‘yicha MTB imzolagan va 2018-yilda uni 5 yilga uzaytirgan. Shuningdek, 2018-yilda “Jel” koni bo‘yicha 25 yillik MTB imzolangan.
“Lukoyl”
“Lukoyl” — Rossiyaning eng yirik xususiy neft va gaz kompaniyasi bo‘lib, 1991-yilda tashkil etilgan. Kompaniya neft va gaz qazib olish, qayta ishlash va sotish bilan shug‘ullanadi. “Lukoyl” dunyodagi eng yirik xususiy neft kompaniyalaridan biri bo‘lib, Rossiyada ham yetakchi o‘rinlarda turadi. “Lukoyl” kompaniyasi O‘zbekistondagi eng yirik xorijiy investorlardan biri bo‘lib, 2004-yildan beri mamlakatda faoliyat yuritadi. Kompaniya “Qandim-Xauzak-Shodi” va “Janubi-G‘arbiy Hisor” loyihalari bo‘yicha mahsulotni taqsimlash bitimlari (MTB) asosida ish olib boradi. 2024-yil iyul oyida “Lukoyl” O‘zbekistondagi faoliyatining 20-yilligini nishonladi. Shu vaqt mobaynida kompaniya mamlakatga 7,5 milliard dollardan ortiq investitsiya kiritdi va 134,4 milliard kub metr tabiiy gaz qazib oldi. “Rosneft” va “Gazprom neft” kompaniyalari Rossiyadagi neftni qayta ishlash sohasidagi soliq islohotlari natijasida ayrim loyihalarning samaradorligi pasayganini ta’kidlagan. Boshqa tomondan, “Lukoyl” kompaniyasi Rossiyadagi neftni qayta ishlash zavodlarida yuqori daromadlilikka erishganini ma’lum qilgan.
