O‘zbekistonning guruh bosqichidagi so‘ngi raqibi ham ma’lum bo‘ldi

Kongo Demokratik Respublikasi milliy terma jamoasi xalqaro futboldagi eng uzoq kutilgan qaytishlardan birini amalga oshirdi. Yarim asrlik tanaffusdan so‘ng, “Liviya qoplonlari” jahon futboli elitasiga qo‘shilish huquqini qo‘lga kiritib, o‘z tarixida yangi sahifa ochdi.

Tuanzebening “oltin” goli

Qit’alararo pley-off bosqichining hal qiluvchi final uchrashuvi haqiqiy asablar jangiga aylandi. Yamayka terma jamoasiga qarshi kechgan murosasiz bahsda asosiy vaqtda darvozalar daxlsizligi saqlanib qolindi. Faqat qo‘shimcha bo‘limlarda muxlislar kutilgan golga guvoh bo‘lishdi.

Uchrashuvning 100-daqiqasida himoyachi Aksel Tuanzebe raqib darvozasini aniq nishonga olib, o‘yin taqdirini hal qildi. Aynan shu minimal 1:0 hisobi kongoiliklarga 2026-yilgi jahon chempionatiga yo‘llanma beruvchi "oltin chipta"ni taqdim etdi. Fransiyalik mutaxassis Sebasten Desabr boshchiligidagi jamoa o‘z mamlakatining uzoq yillik futbol orzusini haqiqatga aylantira oldi.

Tarixiy parallellar

Kongo DR uchun ushbu muvaffaqiyat tarixiy ahamiyatga ega, boisi jamoa o‘z tarixida bor-yo‘g‘i ikkinchi marta mundialda ishtirok etadi. Jamoaning debyuti bundan rosa 52 yil avval, ya’ni 1974-yilda GFRda o‘tgan turnirga to‘g‘ri kelgan edi. O‘sha paytda davlat va terma jamoa Zoir nomi bilan tanilgan.

1974-yilgi ishtirok afrikaliklar uchun ancha og‘ir kechganini ta’kidlash lozim. Guruh bosqichida Shotlandiya, Yugoslaviya va Braziliya bilan to‘qnash kelgan jamoa barcha o‘yinlarda mag‘lub bo‘lgan. O‘shanda uchta uchrashuvda umumiy 0:14 hisobi qayd etilgan bo‘lib, bu jamoaning jahon chempionatlari tarixidagi eng achchiq tajribasi sifatida qolgan edi. Endilikda Sebasten Desabr shogirdlari o‘sha omadsiz seriyaga yakun yasab, yangi tarix yaratishni maqsad qilgan.

Guruh bosqichi va O‘zbekiston bilan to‘qnashuv

2026-yilgi jahon chempionati guruh bosqichida Kongo DR terma jamoasini oson bo‘lmagan sinovlar kutmoqda. Qur’a natijalariga ko‘ra, ular Portugaliya, Kolumbiya va O‘zbekiston bilan bir guruhdan joy oldi.

Markaziy Osiyo futbol muxlislari uchun eng qiziqarli uchrashuv 28-iyun kuni bo‘lib o‘tadi. AQShning Atlantadagi muhtasham Mercedes-Benz Stadium o‘yingohida Kongo DR va O‘zbekiston milliy terma jamoalari o‘zaro kuch sinashishadi. Ushbu bahs har ikki jamoa uchun ham guruhdan chiqish yo‘lidagi strategik ahamiyatga ega uchrashuv bo‘lishi kutilmoqda.

Yarim asrdan keyin katta sahnaga qaytayotgan Kongo DR bu gal 1974-yildagidan mutlaqo boshqacha natija ko‘rsatishga va jahon futbol jamoatchiligini hayratda qoldirishga tayyor ko‘rinadi.

O‘zbekistonning JCh-2026 guruh boshqichidagi yurishi

O‘zbekiston milliy terma jamoasining 2026-yilgi jahon chempionati guruh bosqichidagi ishtiroki uchta muhim bahsdan iborat bo‘ladi.

Vakillarimiz turnirdagi yurishini 18-iyun kuni boshlashadi — shu kuni Toshkent vaqti bilan tonggi soat 07:00 da Kolumbiya terma jamoasiga qarshi uchrashuv belgilangan. Guruhdagi ikkinchi bahs esa 23-iyun sanasiga to‘g‘ri keladi; unda futbolchilarimiz tungi soat 22:00 da kuchli Portugaliya termasi bilan kuch sinashishadi.

Nihoyat, guruh bosqichidagi so‘nggi o‘yin 28-iyun kuni bo‘lib o‘tadi. O‘zbekistonlik ishqibozlar ushbu kuni sahar soat 04:30 da Kongo Demokratik Respublikasi bilan kechadigan hal qiluvchi to‘qnashuvga guvoh bo‘lishlari mumkin. Ma’lumot o‘rnida ta’kidlash joizki, barcha uchrashuv vaqtlari mahalliy (Toshkent) vaqti bilan ko‘rsatilgan.