Маймун чечаги тарқалмоқда

Соғлиқни сақлаш вазирлиги ЖССТ маймун чечаги билан боғлиқ эпидемиологик вазиятдан хавотирдалигини маълум қилди.

Маймун чечаги нима?

Маймун чечаги бугунги кунда мпох номи билан қўлланилмоқда. Мпох вируси одатда ҳайвонлардан одамларга юқадиган, чечакка ўхшаш, аммо оғирроқ бўлмаган касалликка олиб келадиган ортопоксвирусдир. Маймун чечаги одатда енгил ва ўзини ўзи чеклайди, кўпчилик одамлар икки-тўрт ҳафта ичида тузалиб кетади. Бироқ, баъзи одамларда бу вирус жиддий касалликка сабаб бўлиши мумкин.

Ўтган йилги ҳолат

 Маълум қилинишича, Жаҳон соғлиқни сақлаш ташкилоти ўтган йилнинг июл ойида дунёдаги эпидемиологик вазиятни ҳисобга олиб, маймун чечаги яъни мпох вирусини пандемия деб эълон қилган. Жорий йилнинг май ойига келиб эса Дунё бўйича касалланиш ҳолатлари сезиларли даражада пасайиб, ушбу инфекция билан боғлиқ фавқулодда ҳолат бекор қилинган эди. 

Бугунги вазият қандай? 

Бироқ бугунга келиб ЖССТ масъуллари бу ҳолат такрорланаётганидан яна хавотирга тушмоқда. Чунки Конго Демократик Республикасида мпох эпидемияси авж олишни бошлади. Мпох билан йил бошидан буён мамлакатда 13 минг киши касалланиб, улардан 600 нафардан зиёди касаллик оқибатида ҳаётдан кўз юмган. 

“ Ташвишланарли жиҳати, мамлакатда тарқалаётган мпох вируси штамми илк бор анъанавий жинсий алоқа йўли билан юқаётгани аниқланди. Бу эса хавфли инфекциянинг янада кенгроқ кўламда ёйилишига имкон yaratadi.” – дейилади хабарда.

 ЖССТ экспертларининг фикрича, ушбу эпидемиологик вазият қўшни мамлакатлар ва бошқа минтақалар аҳолиси учун ҳам жиддий хавф туғдириши мумкин. Бу юзасидан ташкилот Конгодаги хасталикни жиловлаш учун шошилинч чоралар кўришга кўмаклашади.

Ушбу чечакли вирус ҳақида ЖССТ барча мамлакатларни огоҳлатирди. Маълумот учун, мамлакатимизда ушбу касалликка чалинганлар ҳали аниқланмаган.