Tadbirkorlar uchun mikrokreditlar miqdori 3 karra oshiriladi

Bu haqda Shavkat Mirziyoyev Nukusda tadbirkorlar bilan ochiq muloqotda ma’lum qildi.

Kichik va o’rta biznesni rivojlantirish

Qayd etilishicha, prezident tadbirkorlik uchun qo‘shimcha sharoitlar yaratishda kichik va o‘rta biznesdagi moliyaviy resurslarni ko‘paytirish tashabbuslarni ilgari surdi.

2023-yilda kichik va o‘rta biznesni moliyaviy qo‘llab-quvvatlash uchun yangi tizim joriy qilingan edi. Bu borada Biznesni rivojlantirish banki va Tadbirkorlikni rivojlantirish kompaniyasi tashkil etilib, yil boshidan 35 mingdan ortiq tadbirkorlarga jami 3,5 trillion so‘m mikrokreditlar ajratildi. Bundan tashqari, “Biznesga birinchi qadam” dasturi bo‘yicha tadbirkorlikni endi boshlayotgan 115 ming aholiga 1 trillion so‘mlik mikroqarzlar berildi. Ushbu tajriba yanada kengaytirilishi belgilandi.

Mikrokreditga nisbatan tadbirkorlar ehtiyoji

Prezidentning qayd etishicha, 100 million so‘mgacha mikrokredit bor-yo‘g‘i 9 foiz tadbirkorlarning ehtiyoji uchun yetarli ekanligi ma’lum bo‘ldi. Shu bois, mikrokreditlar miqdori 300 million so‘mga yetkaziladi. Bunda kreditning 100 million so‘mgacha bo‘lgan qismiga garov talab qilinmaydi.

Bu maqsadga bir yilda 10 trillion so‘m beriladi.

Endilikda kichik va o‘rta biznesni qo‘llab-quvvatlashda barcha banklar va mikromoliya tashkilotlari ishtirok etishi mumkin bo‘ladi.

Endi Tadbirkorlik kompaniyasining filiali har bir viloyatda tashkil qilinadi. Kompaniya va uning filiallari hududlarda salohiyati bor tadbirkorlarni aniqlaydi.

Kompaniya kafilliklari yaxshi kredit tarixi va yuqori barqarorlik reytingiga ega tadbirkorlarga beriladi.