Microsoft 9 ming nafar xodimiga ixtiyoriy ravishda nafaqaga chiqishni taklif qilmoqda

Microsoft kompaniyasi o‘zining 51 yillik tarixi davomida ilk bor AQSHdagi xodimlarining bir qismiga kompensatsiya evaziga ishdan ixtiyoriy ravishda ketishni taklif etmoqda. Ushbu dastur Amerika hududidagi xodimlarning 7 foizigacha bo‘lgan qismini qamrab oladi va sun’iy intellektning jadal rivojlanishi hamda infratuzilmaviy xarajatlarning oshishi fonida amalga oshirilayotgan keng ko‘lamli biznes transformasiyasining bir qismiga aylandi.

Kompaniya ta’kidlashicha, gap ommaviy qisqartirishlar haqida emas, balki karyerasining yakuniy bosqichiga yaqinlashgan yoki faoliyat yo‘nalishini o‘zgartirishni rejalashtirayotgan xodimlar uchun «ongli tanlov» imkoniyati haqida bormoqda.

Dasturda kimlar ishtirok eta oladi?

Dastur senior director va undan pastroq lavozimdagi xodimlarga taalluqli bo‘lib, bunda qo‘shimcha shart ham mavjud: xodimning yoshi va kompaniyadagi ish staji yig‘indisi 70 va undan yuqori bo‘lishi lozim.

Shuningdek, bonus tizimiga ega savdo dasturlarida ishtirok etayotgan xodimlar mazkur taklifdan foydalana olmaydilar.

Shaxsiy shartlar va tafsilotlar 7-may kuni xodimlar va ularning rahbarlariga ma’lum qilinadi.

Microsoft qanday kompensatsiyalarni taklif qilmoqda?

Aniq summalar xodimning ish staji va lavozimiga bog‘liq. Biroq kompensatsiyaning bazaviy modeli standart yondashuv asosida shakllantirilgan: bir necha oylik bazaviy ish haqi hamda kompaniyadagi har bir ishlangan yil uchun qo‘shimcha to‘lovlar.

Microsoft avvalgi qisqartirishlar vaqtida ham xodimlarga kengaytirilgan ijtimoiy paketlar, jumladan, bir necha oylik tibbiy sug‘urta va aksiyalar ulushini saqlab qolish imkonini taqdim etgan. Shu sababli, yakuniy kompensatsiya miqdori xodimning darajasi va kompaniyadagi mehnat tarixiga qarab turlicha bo‘lishi mumkin.

Microsoft nima uchun bunday qadamga qo‘l urdi?

Bu qaror kompaniya strategiyasining keng ko‘lamli qayta ko‘rib chiqilishi bilan bog‘liq. Microsoft generativ sun’iy intellektni qo‘llab-quvvatlash uchun ma’lumotlar markazlari (data-sentrlar) va hisoblash infratuzilmasiga investitsiyalarni faol ravishda oshirmoqda.

AI-buki (sun’iy intellekt rivoji) fonida kompaniya xuddi shunday kapital xarajatlarni keskin oshirayotgan Google va Amazon kabi raqobatchilari bilan bellashmoqda. Ayni vaqtda dasturiy ta’minot bozori an’anaviy ishlab chiqish jarayonlarini o‘zgartirayotgan yangi AI-instrumentlari bosimi ostida qolmoqda. Ushbu sharoitda Microsoft resurslarni qayta taqsimlash va xarajatlar samaradorligini oshirishni maqsad qilgan.

Bozor reaksiyasi

Dastur e’lon qilinganidan so‘ng, Microsoft aksiyalari 4 foizdan ko‘proqqa arzonlashdi. Bu texnologik gigantlarning AI-infratuzilmasiga sarflayotgan xarajatlariga nisbatan investorlarning umumiy xavotirini aks ettiradi.

Ushbu pasayish sun’iy intellekt rivojiga faol sarmoya kiritayotgan dasturiy ta’minot sektoridagi boshqa kompaniyalarga ham ta’sir ko‘rsatdi.

Kompaniya ichidagi o‘zgarishlar

Kompaniya ishdan bo‘shatish dasturidan tashqari, xodimlarni rag‘batlantirish tizimini ham qayta ko‘rib chiqmoqda. Endilikda menejerlar mukofot pullarini, jumladan, aksiya va bonuslarni taqsimlashda ko‘proq erkinlikka ega bo‘ladilar.

Shuningdek, samaradorlikni baholash tizimi ham soddalashtirilmoqda: kompensatsiya bo‘yicha to‘qqizta variant o‘rniga beshtasi qoladi. Bu esa jarayonni yanada shaffof va boshqariladigan qilishga xizmat qiladi.