Jinsiy zo‘ravon, qoidabuzar haydovchi — Dinamo shartnoma imzolagan futbolchi haqida

Kingsli Sarfo Dinamo Samarqand bilan bir yillik shartnoma imzolagani haqidagi xabar sport jamoatchiligida katta rezonans uyg‘otdi. Sarfo karyerasi jozibali yakunlar va jiddiy bahsli holatlar aralashmasidan iborat. Ma’lum bo‘lishicha, u professional futbolchilik faoliyati davomida jinsiy zo‘ravonlikda ayblanib, qamalib chiqqan. Xo‘sh, Germaniyaning nomli klublaridan biri – Hoffenheim ostonasidan qaytgan Kingsli Sarfo o‘zi kim?

Futbolchining karyerasi haqida

Kingsli Sarfo 1995-yil 13-fevralda Gana Kumasida tug‘ilgan va yarim himoyachi sifatida faoliyat boshlagan. Uning professional yo‘li Shvetsiyada start olgan. U avval IK Sirius klubida o‘ynagan, keyin 2017-yilda mamlakatning eng nufuzli klubi Malmö FFga o‘tgan. U yerda u Allsvenskan chempionatida bir necha o‘yin o‘tkazgan va uning iqtidorli futbolchi ekanligi keng e’tirof etilgan.

Shundan so‘ng Sarfo Kipr klubida — Olympiakos Nicosia va keyinchalik APOEL FCda o‘ynagan. Uning faoliyati davomida UEFA Chempionlar Ligasining saralash bosqichlari, Yevropa Ligasida ham maydonga tushgani haqida ma’lumotlar mavjud.

2017–2018: jinoyat ishi va sud hukmi

Sarfo nomi tarixga faqat futbolchilik sifatida emas, balki jiddiy jinoyat ishi bilan ham kirib qolgan. 2017-yil sentyabridan boshlab Shvetsiyada futbolchiga qarshi bir nechta jinsiy zo‘ravonlikka oid ayblovlar qo‘yilgan. Unga 14 yoshli qiz bilan jinsiy aloqada bo‘lgani aytildi — Shvetsiya qonunchiligiga ko‘ra 15 yoshdan kichik shaxs bilan shunday munosabatda bo‘lish “bolani zo‘rlash (statutory rape)” deb hisoblanadi.

2018-yil 8-iyun kuni Malmo Tingsratt sudi Sarfoni ikki nafar voyaga yetmagan shaxs bilan jinsiy aloqada bo‘lgani sababli 2 yil 8 oyga ozodlikdan mahrum etish jazosi, shuningdek, 150 000 SEK jarima va Shvetsiyadan deportatsiya qilish haqida hukm chiqargan.

Malmö klubi ham futbolchi bilan shartnomani bekor qilgan.

Boshqa bir manbalarda keltirilishicha, futbolchi chindan ham voyaga yetmagan qiz bilan jinsiy aloqada bo‘lib, undan farzandli bo‘lgan. Biroq Sarfo aliment to‘lashdan qochgani uchun ham jinoiy javobgarlikka tortilgan.

Bundan tashqari, 2017-yil davomida Sarfo Shvetsiyada amaldagi haydovchilik guvohnomasiga ega bo‘lmasdan o‘z mashinasini bir necha marta boshqargan. Shvetsiya qonunchiligiga ko‘ra, bu olti oygacha qamoq jazosiga olib kelishi mumkin, biroq klub tomonidan Sarfoga hech qanday jazo qo‘llanilmagan.

Qamoqdan so‘ng qayta tiklangan karyera      

Sarfo o‘sish yillari davomida jinoiy javobgarlikka tortilishi bois jamoatchilik orasida katta tanqidga uchradi, ayniqsa Shvetsiya va UEFA atrofidagi futbol olamida. Bu voqea futbolchining sport faoliyatiga ancha muddat to‘sqinlik qilgan.

Sarfo jazoni o‘taganidan so‘ng, u 2020-yilda faoliyatini qayta boshlab, yana Kiprda maydoni o‘ynadi — bu uning iqtidorini saqlab qolishiga imkon yaratdi. APOEL bilan u muntazam o‘yin amaliyoti oldi va Yevropa musobaqalarida qatnashdi.

2026-yil boshida u erkin agent sifatida Dinamo Samarqand bilan shartnoma imzoladi va bu O‘zbekiston Superligasi klubi yangi mavsum uchun tarkibini kuchaytirish maqsadida amalga oshirgan transferi sifatida e’lon qilindi.

Hoffenheim transferi: haqiqatmi yoki mish‑mishmi?

Shuningdek, internetda va turli forumlarda 2017-yilda Sarfoga kamida TSG Hoffenheim kabi Bundesliganing jamoalari qiziqqani haqida mish‑mishlar tarqalgan. Bir xil manbalarda, haqiqatan Hoffenheim klubi skautlari futbolchining faoliyatini katta qiziqish bilan kuzatgan va muzokaralar bosqichi boshlanish arafasida bo‘lgan. Aynan, zo‘ravonlik haqidagi xabarlar va futbolchining qamalishi ortidan klub Sarfo transferini bekor qilgan.