«Who is Rustam?!» – Ташқи ишлар вазирлиги Агнешканинг “ошиғи”ни танимаслигини айтди

Аввалроқ Guardian, Al Jazeera, The Diplomat халқаро нашрлари учун ёзадиган мустақил халқаро журналист Агнешка Пикулицка-Вилчевска Twitterдаги саҳифасида Ўзбекистон Ташқи ишлар вазирлиги ходими унга тегажоғлик қилгани, ундан Ўзбекистон ҳақида ижобий мақолалар ёзишини сўрагани ҳақида ёзганди. Шунингдек, полшалик журналистнинг сўзларига кўра, унга аккредитация берилмаган, аккредитация бўйича жавоб қонун бўйича 2 ойда эмас, 6 ойда берилган.

Журналистнинг айтишича, 2020 йилда унга аккредитация беришганидан кейин Ташқи ишлар вазирлигидан бириктирилган «Рустам» исмли ходим унга тегажоғлик қилиб, уни ўпмоқчи бўлган. «У рад жавобини олгач ҳам, мендан учрашишни сўраб ёзаверди», дейди Агнешка.

Халқаро журналист бугун, 2 февраль куни эълон қилган навбатдаги твитда ёзишича, уни ТИВга суҳбатга чақиришган.

“Ҳозиргина Ўзбекистон ТИВ билан суҳбатда бўлдим. Улар менинг акреддитациям масаласи ҳамон очиқ қолаётганини билдиришди. Мен бу ишорани қадрлайман. Бироқ Рустамнинг хатти-ҳаракатларини ўрганиб чиқишнинг иложи йўқлигини айтишди. Сабаби унинг кимлигини ҳеч ким билмас экан. Мен уларга Рустам билан бир неча бор ТИВ биносида кўришганимни, у аввалги аккредитациядан ўтиш жараёнида қатнашганини айтдим. У менга ўтган йили март ойида Меҳнат вазири билан интервью ташкиллаштириб берганди. Уни яхши танишса керак деб ўйлагандим”, деб ёзади польшалик журналист.

Шунингдек, у дўстининг тавсияси билан Рустамнинг телеграмдаги профили қайси рақамга очилганини текшириб кўрган ва бу рақам “Илҳомака МХХ”га тегишли экани маълум бўлган. Шу сабабли у ТИВга қидирилаётган “ошиқ”нинг исми Илҳом бўлиши мумкинлигини айтган.

“Умид қиламанки, сирли Рустамни қидириб топиш ишлари ижобий натижа беради. Илҳом МХХ (ёки Рустам ДХХ) ё ТИВ ёки бошқа бир бошқарув тизимидан топилади. Ҳар қандай ҳолатда ҳам сизларни хабардор қиламан”, дея қўшимча қилган у.

Агнешка Пикулицка твитлари эълон қилингач кенг жамоатчилик вакиллари орасида муҳокамаларга сабаб бўлди. Жамоатчилик арбоблари ҳам ҳолатга ўз муносабатларини билдиришди. Ҳусусан, Сенат раиси Танзила Норбоева ижтимоий тармоқлардаги саҳифасида қуйидагича пост қолдирди:

“Журналист Агнешка Пикуличка билан содир бўлган воқеа Ўзбекистонда ҳам, бошқа мамлакатларда ҳам мутлақо қабул қилиниши мумкин бўлмаган ҳолат. Ўзбекистон инсон шаъни ва қадр-қимматига тажовуз қилишнинг ҳар қандай шаклига асло тоқат қилмаслик сиёсатига амал қилади.

Агнешка ушбу ҳолатни айтиб мардлиги ва бефарқ эмаслигини намойиш этди.

Албатта, ушбу ҳодиса пухта ўрганилиб, таҳлил қилинади, тегишли чоралар кўрилади ва айбдорлар жазоланади. Аммо, у республикада амалга оширилаётган барча улкан ислоҳотларга соя солмаслиги лозим. Ўзбекистон демократик давлат ва эркин фуқаролик жамият барпо этиш йўлини танлади ва шу йўлдан қатъият билан қадам ташлашда давом этади”.

Бундан аввал, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов журналист Агнешка Пикуличканинг шикояти унда жуда жиддий хавотир уйғотди ва албатта, бу холатга аниқлик киритган холда уни синчковлик билан ўрганиш керак деб ҳисоблашини билдирганди.

“Биз Агнешка билан эртагаёқ кўришган холда вазиятни муҳокама қилишга тайёрмиз”, дея пост қолдирган Алламжонов ўзининг ижтимоий тармоқлардаги саҳифасида.

Ташқи ишлар вазирлиги ҳозирча ушбу масала юзасидан ҳеч қандай муносабат билдиргани йўқ. Uz24 журналистининг вазирлик Матбуот хизмати билан боғланишга бўлган уринишлари бесамар кетди.