O‘zbekiston Hukumati BMT Inson huquqlari kengashining Gulnora Karimova ishi bo‘yicha mulohazalariga javob berdi

📍 O‘zbekiston Respublikasi Hukumati BMT Inson huquqlari kengashining O‘zboshimchalik bilan hibsga olishlar bo‘yicha ishchi guruhi tomonidan G. Karimovaning jinoiy javobgarlikka tortilishi yuzasidan qabul qilingan 17/2025-sonli mulohazalariga javoban rasmiy bayonot e’lon qildi.

📝 Bayonotda qayd etilganlar:

– Hukumat ishchi guruhning fikrini bir tomonlama subyektiv ma’lumotlar asosida shakllantirilgan deb ta’kidladi va rasmiy javobning protsessual muddatlar tufayli e’tiborga olinmaganidan tashvish bildirgan.

– O‘zbekiston hukumatining bu boradagi rasmiy javoblari allaqachon taqdim etilganini, shuningdek, xolislik va beg‘arazlik prinsiplariga rioya qilish zarurligini ta’kidladi.

⚖️ Jinoyat ishi va sud jarayoni:

– G. Karimovaning ishi bo‘yicha barcha sud qarorlari yetarli dalillar asosida chiqarilgan va jinoyat-protsessual qonunchilik normalariga to‘liq muvofiq o‘tkazilgan.

– Karimova o‘zining aybini tan olgan holda, sud qarorlari ustidan qonunda belgilangan tartibda shikoyat qilish huquqiga ega.

🌍 Xalqaro hamkorlik:

– O‘zbekistonning Shveysariya Konfederatsiyasi bilan 2022-yilda tuzilgan Bitim doirasida, G. Karimova ilgari jinoiy yo‘l bilan orttirgan va qaytarilgan moliyaviy mablag‘lar O‘zbekiston hukumatining islohotlar dasturini qo‘llab-quvvatlash va BMTning Barqaror rivojlanish maqsadlariga erishish uchun foydalanilmoqda.

– Bu mablag‘lar “Vision 2030” jamg‘armasi orqali boshqarilmoqda, boshqaruv esa BMTning Ko‘p tomonlama sheriklik trast jamg‘armasi tomonidan amalga oshiriladi.

💬 Hukumatning yakuniy bayonoti:

– O‘zbekiston inson huquqlari sohasidagi xalqaro majburiyatlarini vijdonan bajarib kelayotganini ta’kidlagan va BMT mexanizmlari bilan konstruktiv muloqotni qo‘llab-quvvatlashga tayyor ekanligini bildirgan.

– Hukumat o‘z obro‘sini himoya qilish va ishonchli axborotni manfaatdor tomonlarga tushuntirish bo‘yicha keyingi qadamlarni qo‘yish huquqini o‘zida saqlab qoladi.