Eng ko‘p qaysi turdagi jinoyatchilar qidiruvdaligi ma’lum bo‘ldi

Poytaxt ko‘chalarida bir qarashda hammasi odatdagidek – tirbandlik, shoshilayotgan odamlar, tungi chiroqlar…

Ammo bu sokin manzara ortida bir yil davom etgan ko‘rinmas “ov” bor: kimdir suddan qochdi, kimdir tergovdan yashirindi, yana kimdir jinoyat izlarini yo‘qotaman deb mamlakat chegarasidan oshib ketdi. 2025-yil yakunlari Toshkentda qidiruvga berilgan minglab shaxslar bo‘yicha keskin raqamlarni ochib berdi. Firibgarlik eng yuqori cho‘qqida, og‘ir jinoyatlar soni kamroq, xalqaro hamkorlik esa bir necha davlatlar kesimida real natija ko‘rsatgan.

Qidiruv e’lon qilinganlarning yarmi qo‘lga olingan

Toshkent shahar Ichki ishlar bosh boshqarmasi ma’lumotiga ko‘ra, yil davomida shahar IIBB, hududiy ichki ishlar organlari, prokuratura va sud tizimi hamkorligida 3923 nafar shaxs rasmiy qidiruvga berilgan. Ularning 2146 nafari tezkor-qidiruv tadbirlari natijasida ushlangan.

Firibgarlik jinoyatlari yetakchi o‘rinda

Jinoyatlar tahlili shuni ko‘rsatadiki, qidiruvga berilgan shaxslarning eng katta qismi firibgarlik bilan bog‘liq jinoyatlarni sodir etgan. Bu toifa bo‘yicha 1084 nafar shaxs qidiruvda bo‘lgan.

Shuningdek:

• 293 nafar shaxs o‘g‘irlik,
• 143 nafar shaxs giyohvand moddalar bilan bog‘liq jinoyatlar bo‘yicha qidiruvga olingan.

Og‘ir va o‘ta og‘ir jinoyatlar bo‘yicha ko‘rsatkich past

Statistikaga ko‘ra, qotillik va boshqa og‘ir jinoyatlar bilan bog‘liq qidiruvdagi shaxslar soni nisbatan kam:

• Qotillik — 6 nafar
• Og‘ir tan jarohati yetkazish — 18 nafar
• Odam savdosi — 7 nafar
• Talonchilik — 38 nafar

Mutaxassislar buni jinoyatlarning oldini olish va profilaktika tadbirlarining kuchaygani bilan izohlamoqda.

Xorijda ushlanganlar va ekstraditsiya jarayoni

Yil davomida 86 nafar qidiruvdagi shaxs respublika hududidan tashqarida ekanligi aniqlanib, xorijiy huquqni muhofaza qiluvchi organlar bilan hamkorlikda ushlangan. Ularning:

• 73 nafari MDH davlatlarida,
• 17 nafari boshqa xorijiy mamlakatlarda qo‘lga olingan.

Mazkur shaxslarning 67 nafari O‘zbekistonga ekstraditsiya qilingan.

Rasmiy qidiruvsiz aniqlangan shaxslar ham javobgarlikka tortildi

Tergov va sud organlariga kelishdan bo‘yin tovlab yurgan, ammo rasmiy qidiruv e’lon qilinmagan 741 nafar shaxs ham aniqlanib, tegishli tartibda huquqni muhofaza qiluvchi organlarga olib kelingan.

Yillar davomida qidirilgan shaxslar ham qo‘lga olindi

2025-yilda uzoq yillar davomida yashirinib yurgan 73 nafar shaxs aniqlanib, qonun oldida javob berdi. Xususan, odam savdosi jinoyatida ayblanib, 2012-yildan buyon qidiruvda bo‘lgan Risolat ismli shaxs joriy yilning 19-mart kuni qo‘lga olingani ma’lum qilindi.

Huquqni muhofaza qiluvchi organlar jinoyatchilikka qarshi kurash, qidiruvdagi shaxslarni aniqlash va xalqaro hamkorlikni kuchaytirish bo‘yicha ishlar izchil davom ettirilishini ta’kidlamoqda.