Nima uchun ko‘p qavatli uylarning isitish tizimida tez-tez muammolar yuzaga keladi?

Ko‘p qavatli uylar aholisi vaqti-vaqti bilan isitish va issiq suv bosimining pasayishi holatlariga duch keladi. Buning sababini odatda tizimdagi texnik muammolar yoki shahar infratuzilmasi bilan bog‘lashadi. Biroq Veolia mutaxassislari bu muammolarning ortida odamlarning o‘zlari ham turishini ta’kidlamoqda.

Quvurlarni tozalash paytida issiq suvning oqizilishi

Ko‘p hollarda issiq suv bosimining pasayishi va isitish tizimidagi muammolar quvurlarni tozalash yoki ta’mirlash jarayonida katta miqdorda suvning yo‘qolishi bilan bog‘liq. Hatto muammo bitta uyda hal qilinsa ham, bu qo‘shni uylarning issiq suv va isitish tizimiga salbiy ta’sir ko‘rsatishi mumkin.

Isitish tizimidagi noqonuniy o‘zgarishlar

Ayrim fuqarolar o‘z xonadonlaridagi isitish tizimini yaxshilash maqsadida ruxsatsiz o‘zgarishlar kiritadi. Masalan, radiatorlar sonini oshirish, oshxonani yoki batareyalarni balkonga ko‘chirish, quvurlar tuzilishini o‘zgartirish kabi holatlar ko‘p uchraydi. Biroq bunday o‘zgarishlar butun uy bo‘ylab issiqlik taqsimotiga salbiy ta’sir qiladi va boshqa xonadonlarning isitish sifatini pasaytiradi.

Veolia aholini qoidalarga rioya qilishga chaqirdi

Kompaniya aholiga hushyor bo‘lishni va uy-joy kommunal tizimlariga o‘zboshimchalik bilan aralashmaslikni maslahat bermoqda. Har bir xonadondagi kichik o‘zgarish butun uy uchun noqulaylik tug‘dirishi mumkin.

“Biz sizning tushunishingiz va suv hamda isitish tizimlaridan to‘g‘ri foydalanish qoidalariga rioya qilishingizga umid qilamiz”, — deyiladi Veolia bayonotida.