Намангандаги қурилишда ишчиларни тупроқ босиб қолди. Ишчилар воқеа жойида ҳалок бўлган

2021 йил 24 апрель куни соат 14:10 ларда “Azizbek Avtogaz Servis” МЧЖга тегишли бўлган Наманган шаҳар, Шодлик МФЙ, А.Навоий кўчасида жойлашган қурилиши тугалланмаган кўп қаватли уйларга канализация тармоғини тортиб ўтиш учун траншея ковлаш ишлари олиб борилаётган вақтда, тупроқ қатламининг ўпирилиб кетиши натижасида ер сатҳидан 4,5 метр пастликдаги траншея ичида ишлаётган ёлланма ишчилар Чортоқ тумани, Чортоқ МФЙда яшаган К.Ё. ва Наманган тумани, Навбаҳор МФЙда яшаган А.Ш.лар тупроқ остида қолиб, ҳодиса жойида вафот этишган.

Вилоят прокуратураси олиб борган терговга қадар текширув натижасида қурилиши тугалланмаган кўп қаватли турар жой объектлари қурилиши ва канализация тармоғини тортиш ишлари Наманган шаҳрида фаолият олиб борувчи “Azizbek Avtogaz Servis” МЧЖ томонидан амалга оширилаётганлиги, жамиятга турар жой объектларини қуриш учун Наманган шаҳар ҳокимининг 20.06.2018 йилдаги 913-сонли қарорига асосан рухсат берилганлиги, бироқ канализация тармоғи тортиш учун ер участкасида қазиш ишларини амалга оширишга шаҳар ҳокимининг тегишли рухсатномаси олинмаганлиги аниқланган.

Ҳозирда вафот этган шахсларнинг ўлими сабабларини аниқлаш юзасидан суд-тиббий экспертизаси тайинлангани айтилмоқда.

Наманган шаҳар ИИО ФМБ ҳузуридаги ТБ томонидан мазкур ҳолат юзасидан 24.04.2021 йилда Ўзбекистон Республикаси Жиноят кодексининг 257-моддаси 2-қисми “б” банди билан жиноят иши қўзғатилиб, дастлабки тергов ҳаракатлари олиб борилмоқда.